Մարդը, քաղաքացին ցանկացած պետության գլխավոր ռեսուրսն է և գանձը… Կան պետություններ, որոնք դա գիտակցում են և հսկայական գումարներ են ծախսում, որպեսզի իրենց քաղաքացիների համար արժանավայել և հարմարավետ կենսապայմաններ ստեղծեն, նաև նրա համար, որ «իրենց տարածքի» մեջ ներգրավվեն օտար երկրներից քաղաքացիներ(ռեսուրս): Այդ «օտար» ռեսուրսի համար այնպիսի պայմաններ են ստեղծում, որպեսզի նա մնա այդ երկրում, ծառայի նրա հզորացմանն ու զարգացմանը: Բայց, ցավոք, կան նաև այնպիսի երկրներ, որոնք անպատասխանատվորեն են վերաբերում «իրենց ռեսուրսներին»: Մտածված կամ անգիտակցաբար, բայց ստիպում են իրենց երկրի քաղաքացիներին տեսնել իրենց ապագան ոչ այն երկրի սահմաններում, որտեղ ծնվել են, և ըստ տրամաբանության պետք է ապրեն և կառուցեն…

Ցավոք, բայց իր երկրի ապագայի հանդեպ նման վնասակար քաղաքականություն վարող «հիասքանչ» օրինակ է Վրաստանը: Երկիր, որն իր անկախության հռչակման օրից ի վեր, ոչ պաշտոնական տվյալների համաձայն` կորցրել է բնակչության շուրջ 35%: Եվ դա առանց հաշվառելու բռնագրավված Աբխազիայի և Հարավային Օսեթիայի բնակչությունը:

Դժվար է ասել` արե՞լ է արդյոք Կառավարությունը որևէ եզրակացություն, մինչդեռ վերջին իրադարձությունները, երբ պետությունը խստացրեց «վիզային քաղաքականությունը», և փաստացիորեն խոչընդոտներ է առաջացնում կրկին Վրաստանի քաղաքացիություն ստանալ ցանկացող իր նախկին քաղաքացիների համար` պատճառաբանելով, որ «նրանք սպառնալիք են ներկայացնում երկրի անվտանգությանը», հանգեցնում է այն մտքին, որ եզրակացություներ չեն արվել: Կամ էլ, ինչն ավելի վատ է, ամբողջ կատարվածը մտածված քաղաքականության մի մասն է կազմում` իր իսկ երկրում ժողովրդագրական տվյալների փոփոխության համար… Մինչդեռ կբերի՞ արդյոք Վրաստանին շահ ժողովրդագրական տվյալների նման փոփոխությունը, ծայրահեղ վիճահարույց հարց է, որի պատասխանը ավելի հեշտ է տալ` հաշվի առնելով ՄԱԿ-ի հրապարակած տվյալները, որոնց համաձայն 2050թ.-ին Վրաստանի բնակչությունը կկրճատվի 28%:

«Վրաստանի առջև կան բազում խնդիրներ, որոնցից մեկն էլ մերր ժողովրդագրական վիճակն է: ՄԱԿ-ն հետազոտություն է անցկացրել, ըստ որի Վրաստանի բնակչությունը 2050 թվականին կկրճատվի 28%-ով: Միաժամանակ մեր հարևանների բնակչությունը կաճի: Ադրբեջանի բնակչությունը 2050 թ.ին կաճի 34%-ով, իսկ Հայաստանինը` 6%-ով: Սա նշանակում է, որ մեր տարածաշրջանում սպասվում է հավասարակշռության խախտում: Մենք, իհարկե, դեմ չենք, որ մեր եղբայրական հարևանների բնակչությունն աճի, բայց մեզ անհանգստացնում է մեր ժողովրդագրական խնդիրը, որը հավասարազոր է ազգի ֆիզիկական գոյատևմանը: Ծնելիությունը սաստիկ նվազել է: Նույնիսկ երկրորդ համաշխարհային պատերազմի ժամանակ ծնելիության մակարդակն ավելի բարձր էր, քան հիմա», -2014թ. մարտին հայտարարել է Առողջապահության հարցերով Խորհրդարանական հանձնաժողովի նախագահ Դմիտրի Խունդաձեն:

Վաղը` նոյեմբերի 5-ին, Վրաստանի ամբողջ տարածքով մեկ կսկսվի Բնակչության Համընդհանուր Մարդահամար, որը կտևի մինչ նոյեմբերի 19-ը: Վրաստանի Ազգային Վիճակագրական Գործակալության տարածած տեղեկության համաձայն` Բնակչության Համընդհանուր Մարդահամարի մոտավոր տվյալները հայտնի կդառնան 2015թ. ամռանը, իսկ ամբողջական հաշվետվությունը հրապարակված կլինի 2016թ. ձմռանից ոչ շուտ:

Դե´ ինչ… Հուսանք, որ երկիրը դեռևս չի հատել «անդառնալիի սահմանը», և ստացած տվյալները կծառայեն երկրի Կառավարությանը որպես լրացուցիչ խթան իր իսկ քաղաքացիների կենսապայմանները բարելավվելու և, հետևաբար, պետության ապագա անվտանգության վերագիտակցման համար:

Հիշեցնենք, որ վերջին անգամ Վրաստանում բնակչության ընդհանուր մարդահամար է անցկացվել 2002թ.ին: Հարգելի ընթերցողին ենք ներկայացնում երկրի հայ բնակչությանը վերաբերող մի քանի տվյալներ նախկին մարդահամարից.

Վրաստանի բնակչության ընդհանուր քանակն է` 4 371 535 մարդ.

Վրաստանի` ազգությամբ հայ քաղաքացիները` 248929 մարդ, ինչը կազմում է երկրի ընդհանուր բնակչության 5,7%-ը:  Անհրաժեշտ է նշել, որ բնակչության նախկին մարդահամարի ժամանակ, 1989թ.ին Վրաստանում հայերի քանակը կազմում էր 437211 մարդ, որը տոկոսային հարաբերությամբ  ընդհանուր բնակչության 8,1 %-ն է: Այդ կերպ 1989-2002թթ. Ժամանակահատվածում  Վրաստանում հայերի քանակը պակասել է 188282 մարդով:

Ընթերցողի ուշադրությանն ենք ներկայացնում ազգությամբ հայ քաղաքացիների տվյալներով ցուցակը`ըստ Վրաստանի շրջանների. 

Իսկ հիմա եկե՛ք ուշադրություն դարձնենք Մայրենի լեզվի մասին տվյալներին.

Համաձայն «2002թ.ի բնակչության ընդհանուր մարդահամարի» տվյալների` 235531 հայ նշել են Հայերենը` որպես Մայրենի լեզու: Այսինքն Վրաստանի քաղաքացի հայերի 94,61 %-ը իրենց մայրենի լեզուն համարում են Հայոց լեզուն: Միաժամանակ 11 852 վրացի և 1 281 ռուս նշել են, որ կատարյալ տիրապետում են հայերեն լեզվին:

5 692 հայեր նշել են, որ իրենց համար մայրենի լեզուն վրացերենն է: Իսկ 7 525 հայ, որպես մայրենի լեզու է նշել ռուսերենը: Հարկ է նշել, որ  հայերենը որպես մայրենի լեզու է նշել 15 վրացի, 19 ադրբեջանցի: 81 414 հայ նշել է, որ կատարյալ տիրապետում է վրացերենին: 95 618 հայեր հայտնել են, որ ոչ մի այլ լեզվի բացի մայրենիից չեն տիրապետում:

Ցավոք, «ՍակՍտատ»-ը չի հրատարակել ոչ մի տեղեկություն, որի համաձայն հնարավոր կլիներ ուսումնասիրել լեզվական պատկերն ըստ երկրի շրջանների: Մինչդեռ ինչ վերաբերում է կրոնին, Ազգային վիճակագրական ծառայությունը ներկայացրել է հետևյալ տվյալները, այդ թվում նաև ըստ շրջանների.

Վրաստանի 171 139 քաղաքացիներ նշել են, որ Հայ Առաքելական Եկեղեցու հետևորդներ են, ինչը  կազմում է Վրաստանում ապրող հայության ընդհանուր քանակի 68,б75 %-ը և երկրի բոլոր քաղաքացիների քանակի 3,9%-ը: Հայ Առաքելական եկեղեցու հետևորդներն են. Թբիլիսիում` 51 687 մարդ, Սամցխե-Ջավախքում` 87 827 մարդ, Քվեմո-Քարթլիում` 25 688 մարդ,Աջարիայի ինքնավար հանրապետությունում`3 162 մարդ,Կախեթիում`1 146 մարդ և 1629 մարդ Վրաստանի այլ շրջաններում:

http://armenian-community.ge/News/860