Տոներին ընդառաջ Հայաստանում սննդամթերքի թանկացումը անխուսափելի է. Արմեն Պողոսյան
06-11-2014 18:08:03 | | Տնտեսություն
Սպառողների միության նախագահ Արմեն Պողոսյանը կանխատեսում է, որ ամանորյա տոներին ընդառաջ Հայաստանում հացի և հավկիթի գները կբարձրանան: Լրագրողների հետ նոյեմբերի 6-ին կայացած հանդիպման ժամանակ նա որպես հիմնավորում իր կանխատեսմանը նշեց, որ Հայաստանում տնտեսական քաղաքականությունը վատ է վարվում, այն որակելով որպես «կարկատանային» քաղաքականություն, քանի որ ամեն օր նոր խնդիրներ են առաջանում:
Ըստ Ա.Պողոսյանի` յուրաքանչյուր տնտեսվարող, որն անվերահսկելի է ու անպատժելի, ամեն ինչ կանի, որպեսզի իր արտադրանքը ավելի թանկացնի և «մեզ հալածի»:
«Տնտեսական քաղաքականության առումով վստահաբար կարող եմ ասել, որ թռչնամիս արտադրելը տնտեսական գործունեության մեջ ամենահեշտ ձևն է. Այստեղ ամենաարագ տարբերակով է տեղի ունենում փողի շրջանառություն և շահույթի ավելացում, հետևաբար մենք պետք է չունենայինք ձվի և թռչնամսի ներկրման խնդիր»,- ընդգծեց Ա. Պողոսյանը:
Վերջինիս տեղեկացմամբ, ձու և թռչնամիս արտադրող ընկերությունները, որոնք ներկրում են թռչնակեր և սորտային ձագեր, բազմիցս դիմել են Հայաստանի կառավարությանը և Սպառողների միությանը սահմանին ավելացված արժեքի հարկի (ԱԱՀ) գանձման ժամկետի հետաձգման խնդրանքով: Հետաձգումն ընկերություններին հնարավորություն կտա տարվա ընթացքում վճարել ԱԱՀ-ն` ներկրված ապրանքների շրջանառությունից ձեռք բերված գումարներով:
Ըստ Ա. Պողոսյանի` այսպիսի քաղաքականությունը կապահովի միայն տնտեսության զարգացում:
Բանախոսը անտրամաբանական է համարում Իրանից և Ուկրաինայից ձվի ներկրումը այն դեպքում, երբ Հայաստանում շատ թռչնաֆաբրիկաներ դատարկ են. «Կա տարածք, կան պայմաններ մեր թռչնաֆաբրիկաներում, բայց չկան ընթացիկ ծախսերի համար գումարներ»:
«Միթե հավ պահելու համար պարտադիր պետք է արտերկրից եգիպտացորեն ներկրենք, ինչո՞ւ մենք չենք կարող եգիպտացորեն աճեցնել»,- հարց է տալիս Ա. Պողոսյանը, միաժամանակ պատասխանելով, որ Արցախում կան այնպիսի տարածքներ, որոնք ի վիճակի են ապահովել Հայաստանի սննդամթերքի 30 տոկոսը:
Անդրադառանլով հացի թանկացման խնդրին` Սպառողների միության նախագահը նշեց, որ 5 օր առաջ նամակով դիմել է ՀՀ Նախագահի վերահսկողության ծառայության պետին, հացի գնի և քաշի հարաբերակցության ստուգման առաջարկով:
«Հացի քաշի և գնի հարաբերակցությունը մենք պարտավոր ենք կարգավորել, քանի որ տարիներ առաջ արված մեր ուսումնասիրությունները ցույց տվեցին, որ հացի քաշի տարբերությունը մինչև 30 տոկոս է կազմում»,- ընդգծեց Ա. Պողոսյանը` խնդրելով ուշադրություն դարձնել այն փաստին, որ այդ հարաբերակցությունը ոչ թե 30 տոկոս է, այլ մինչև 30 տոկոս: Ըստ նրա` սա նշանակում է, որ այս սահմաններում մենք խաբվում ենք:
Բանախոսը հույս հայտնեց, որ հացի խնդիրը կլուծվի, երբ Նախագահը ուշադրություն կդարձնի իրենց նամակին` ԶԼՄ-ների հրապարակումների շնորհիվ, ինչ վերաբերում է նախատոնական թանկացումներին, ապա, ըստ Ա.Պողոսյանի, այս երևույթը նկատվում է ամբողջ աշխարհում, սակայն ի տարբերություն քաղաքակիրթ աշխարհի` Հայաստանում եկամուտները արագ տեմպերով չեն ավելանում, որպեսզի չնկատվի գների նոմինալ աճ»:
ՀԱՅԵՐԵՆ
Русский
English
Դաս. հայերեն
French
