Հայաստանում մամուլը չի կարող լինել ազատ, քանի որ տեղեկատվություն ստանալու գործընթացում լրագրողներին բազմաթիվ խոչընդոտներ են հանդիպում:
Այսպիսի կարծիք հայտնեց «Ինֆորմացիայի ազատության կենտրոն» հասարակական կազմակերպության նախագահ Շուշան Դոյդոյանը այսօր տեղի ունեցած «Մամուլի ազատություն» թեմայով քննարկման ժամանակ, որը կազմակերպել էր Հայաստանում ԱՄՆ դեսպանության հասարակայնության հետ կապերի բաժինը:
Քննարկման բանախոսներն էին Շուշան Դոյդոյանը, «Առավոտ» օրաթերթի գլխավոր խմբագիր Արամ Աբրահամյանը եւ տեղեկատվական հարցերով փորձագետ, բլոգեր Սամվել Մարտիրոսյանը:
Բանախոսների տեղեկացմամբ` այսօր շատ լրագրողներ օգտվում են այլընտրանքային լրատվամիջոցներում` բլոգերում իրենց կարծիքը հրապարակելու հնարավորություններից, քանի որ հայաստանյան մամուլն ազատ չէ:
Ինչպես նշեց Շ. Դոյդոյանը, լրագրողները պետք է պատասխանատու լինեն իրենց ասած ամեն խոսքի համար, քանի որ լրագրողների հրապարակումները զանգվածային են. «Ազատությունն ու պատասխանատվությունը մեկ ամբողջի երկու տարբեր մասեր են»:
Քննարկմանը մասնակցում էին նաեւ տարբեր համալսարանների ժուռնալիստիկայի ֆակուլտետի ուսանողներ: