Հունիսմեկյան ուրախ միջոցառումներ անցկացվեցին Հանրապետական էնդոկրինոլոգիական մանկական դիսպանսերում (տեսանյութ և ֆոտոշարք)

02-06-2015 18:14:50 | Հայաստան | Բարեգործություն

Երեխաների պաշտպանության միջազգային օրվա կապակցությամբ մանկական շաքարային դիաբետով հիվանդ երեխաների համար «Երազ» բարեգործական հիմնադրամը Հանրապետական էնդոկրինոլոգիական մանկական դիսպանսերի հետ համատեղ անցկացրեց հունիսմեկյան տոնական միջոցառումներ:

Հիվանդանոցի բակում փոքրիկների մասնակցությամբ կազմակերպվեց կավճանկարչություն, ապա մուլտհերոսների և զվարճալի ծաղրածուների հետ փոքրիկները երգեցին, պարեցին և ասմունքեցին:

Հանրապետական մանկական դիսպանսերի ղեկավար Ելենա Աղաջանովայի խոսքով` նմանատիպ միջոցառումներ երեխաների համար կազմակերպվում են ինչպես հունիսի մեկին, այնպես էլ այլ օրերի. «Այսպիսի միջոցառումները թույլ են տալիս երեխաներին միմյանց հետ շփվել, ուրախանալ և իրենց լիարժեք զգալ»,- ասաց նա:

Ե. Աղաջանյանի կարծիքով` Հայաստանում երեխաներն իսկապես պաշտպանված են, սակայն այդուհանդերձ, ըստ նրա, դեռևս կան չլուծված խնդիրներ:

Որպես առաջնային խնդիր` ՀՀ գլխավոր մանկական էնդոկրինոլոգն առանձնացրեց ամեն օր երեխաների արյան մեջ շաքարի չափման համար պահանջվող ստրիպերի, նաև ներարկիչների գնային անմատչելիությունը:

Ե. Աղաջանովան նշեց, որ այս հարցերում դիսպանսերին իր աջակցությունն է ցուցաբերում «Երազ» բարեգործական հիմնադրամը, սակայն տրամադրվող օգնությունը հարյուր տոկոսով չի լուծում խնդիրները:

Մանկական շաքարային դիաբետով հիվանդ երեխաներին աջակցելու և նրանց խնդիրները ինչ որ չափով լուծելու նպատակով ստեղծված «Երազ» բարեգործական հիմնադրամը իր շահառու երեխաներից 16-ին հանձնեց «Մեգա Թոյս» ընկերության կողմից տրամադրված անակնկալ նվերներ: Ինչպես «Նոյյան Տապանի« թղթակցի հետ զրույցում նշեց «Երազ»-ի տնօրեն Կարինե Մխիթարյանը, իրենց հիմնադրամը պարբերաբար կազմակերպում է նմանատիպ միջոցառումներ երեխաների համար. «Այս 16 երեխաների ընտրությունը պայմանավորված էր նախ նրանց տարիքով (4-8 տարեկան), որովհետև ճամբարային և սրճարանային միջոցառումներին մասնակցում են ավելի ինքնուրույն երեխաները, ապա ընտանիքի սոցիալական վիաճակով»:

Կ. Մխիթարյանի տեղեկացմամբ` «Երազ»-ին աջակցում է նաև Sweet and Light ընկերությունը, որը անվճար մանկական քաղրավենիք է տրամադրում հիմնադրամի շահառու երեխաներին:

Միջոցառման լուսանկարներն այստեղ

Էլիզա Զախարյան, «Նոյյան Տապան»

Նոյյան տապան - Բարեգործություն

Կարդացել են 1433 անգամ

Հունիսմեկյան ուրախ միջոցառումներ անցկացվեցին Հանրապետական էնդոկրինոլոգիական մանկական դիսպանսերում (տեսանյութ և ֆոտոշարք)

Noyan Tapan TV