ԵՐԵՎԱՆ, 11 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Դեկտեմբերի 10-ին տեղի ունեցավ «Մարդու իրավունքների եվրոպական դատարանի վճիռների դերն ու նշանակությունը ՀՀ իրավական համակարգում» թեմայով իրավաբան ուսանողների հանրապետական գիտաժողովի եզրափակիչ փուլը: Հայաստանի երիտասարդ իրավաբանների ասոցիացիայի եւ Հոլանդական Ստրիչտինգ Օքսֆամ Նովիբ հիմնադրամի կազմակերպած գիտաժողովը նվիրված էր «Մարդու իրավունքների եւ հիմնարար ազատությունների պաշտպանության մասին» եվրոպական կոնվենցիայի ընդունման 60 ամյակին: Գիտաժողովը բաղկացած էր 2 փուլից՝ գրավոր եւ բանավոր: Գիտաժողովին մասնակցելու հայտ էին ներկայացրել 14 ուսանողներ՝ Երեւանից եւ ՀՀ մարզերի իրավաբանական բուհերից եւ բուհերի իրավաբանական ֆակուլտետներից: Գրավոր փուլին մասնակցեցին սահմանված ժամկետներում կազմակերպիչներին իրենց զեկույցները ներկայացրած 8 իրավաբան ուսանողներ: Ներկայացված հինգ լավագույն աշխատանքների հեղինակներն իրավունք ստացան մասնակցելու բանավոր փուլին: Նրանք զեկույցներում անդրադարձել էին Մարդու իրավունքների եվրոպական դատարանի նախադեպային իրավունքին, ընդդեմ Հայաստանի Հանրապետության կայացրած ՄԻԵԴ-ի վճիռներին եւ դրանց կատարման գործընթացին: Գիտաժողովի բանավոր փուլի հաղթող եւ լավագույն հռետոր ճանաչվեց Եվրոպական կրթական տարածաշրջանային ակադեմիայի 3-րդ կուրսի ուսանողուհի Շուշանիկ Թադեւոսյանը եւ արժանացավ գիտաժողովի երրորդ մրցանակին: «Լավագույն գրավոր զեկույց» մրցանակին արժանացավ Երեւանի պետական համալսարանի մագիստրատուրայի 1-ին կուրսի ուսանողուհի Անահիտ Հարությունյանը եւ արժանացավ գիտաժողովի երկրորդ մրցանակին: Իսկ գիտաժողովի հաղթող ճանաչվեց ՀՀ գիտությունների ազգային ակադեմիայի Գիտակրթական միջազգային կենտրոնի մագիստրատուրայի երկրորդ կուրսի ուսանող Գեւորգ Հակոբյանը: Ըստ Հայաստանի երիտասարդ իրավաբանների ասոցիացիայի տարածած հաղորդագրության, գիտաժողովի հաղթողները ստացան արժեքավոր մրցանակներ եւ համապատասխան հավաստագրեր: Գրավոր փուլի մյուս մասնակիցները եւս արժանացան մասնակցության հավաստագրերի եւ մրցանակների:

---