Հարյուրավոր միգրանտներ տեղափոխող նավակ է խորտակվել Մալազիայի ափերի մոտակայքում
03-09-2015 14:17:50 | | Միջազգային
Մալազյիայի արևմտյան ափի մոտակայքում խորտակվել է շուրջ 100 միգրանտներ տեղափոխող փայտե նավակ: Այս մասին գրում է lenta.ru-ն` վկայակոչելով The South China Morning Post-ին:
12 մարդու հաջողվել է փրկվել, իսկ մի քանի մահացածների ջրից դուրս են բերել տեղացի ձկնորսները, մյուսները համարվում են անհետ կորած: Դեպքի վայր են ուղևորվել մի քանի նավեր և ինքնաթիռներ:
Ցամաքային պահակախմբի տեղեկություններով` նավակում գտնվել են ինդոնեզացի ապօրինի աշխատողներ, ովքեր փորձել են վերադառնալ իրենց հայրենիք` Սումատրա նահանգ:
Միգրանտներով բեռնված նավակն ընկել է փոթորիկի մեջ և շուռ եկել:
Մալազիան համարվում է աշխարհում առավել դինամիկ զարգացող երկրներից մեկը, որի տնտեսությանը տարեցտարի անհրաժեշտ է ավելի շատ աշխատողներ: Հենց այս պատճառով բազմաթիվ միգրանտներ Ինդոնեզիայից ապօրինի ճանապարհով ուղևորվում են հարևան երկիր արմավենու տնկարկներում աշխատելու համար: Տեղի իշխանությունների տվյալներով` Մալազիայում ապրում են մոտ 2 մլն ապօրինի աշխատողներ: