Պարզվում է` կոֆեինը 40 րոպեյով հետ է քցում մարդու ներքին «ժամացույցը»
17-09-2015 17:12:44 | ԱՄՆ | Գիտություն եւ տեխնոլոգիաներ
Ճաշից հետո մեկ բաժակ էսպրեսսոն ոչ միայն թարմացնում և օգնում է մարդուն ուշ քնելու հարցում, այլև խառնում է մարմնի ներքին «ժամացույցը»: Նման եզրակացության են հանգել ամերիկացի գիտնականները, որոնք այդ մասին հոդված են հրապարակել Science Translational Medicine ամսագրում: Այս մասին գրում է lenta.ru-ն:
Հետազոտողները պարզել են, որ եթե քնելուց առաջ մարդն օգտագործում է կրկնակի էսպրեսսո, ապա այն մարդու ներքին ժամանակը հետ է քցում մոտ 40 րոպեյով: Փորձնական և հետազոտական աշխատանքների համար ներգրավել են հինգ մարդու, որոնք քնելուց առաջ ընդունել են կոֆեին պարունակող հաբեր: Ուսումնասիրությունների արդյունքում պարզվել է, որ կոֆեինն ազդում է մարդու մարմնի վրա այնպես, ինչպես պայծառ լույսը, որը հանդիսանում է մարդու օրգանիզմի ներքին «ժամացույցի» սլաքների խառնման գլխավոր գործիքը:
Գիտնականները նաև պարզել են, որ կոֆեինը օգնում է մարդու օրգանիզմին հաղթահարել բացասական ազդեցությունները: Ժամանակին սուրճի ընդունումը նպաստում է, որպեսզի մարդն ավելի արագ ադապտացվի օրվա ընթացքում ժամանակային փոփոխություններին: