Առաջնային խնդիրները` նոր վարկային ծրագրի առանցքում
19-09-2015 11:26:40 | Հայաստան | Գիտություն եւ տեխնոլոգիաներ
ՀՀ կրթության և գիտության նախարար Արմեն Աշոտյանն ընդունել է Համաշխարհային բանկի կրթության թիմի ներկայացուցիչներ Դանդան Չենին, Նինո Կուտատելաձեին, Ջուլիա Լիբերմանին, Սորեն Նելլմանին և Անուշ Շահվերդյանին: Հանդիպման ընթացքում քննարկվել են «Կրթության որակ և համապատասխանություն» երկրորդ վարկային ծրագրի արդյունքները, ինչպես նաև ընթացքի մեջ գտնվող «Կրթության բարելավում» նոր վարկային ծրագրի ընթացքին առնչվող մի շարք հարցեր:
Շեշտելով ՀԲ աջակցությունը կրթական բարեփոխումների իրագործման ու ոլորտի զարգացման գործում՝ ՀՀ ԿԳ նախարարը կարևորել է հատկապես հաջողությամբ իրագործված նախակրթարանների հիմնադրման ծրագիրը, ինչպես նաև Հայաստանի 10 բարձարագույն ուսումնական հաստատություններում «Նորարարական մրցակցային հիմնադրամների» փորձարկումը, որի շնորհիվ բուհերում բացվել են ժամանակակից լաբորատորիաներ, կատարվել է ենթակառուցվածքների զարգացում և տեխնիկական վերազինում: ՀԲ նոր վարկային ծրագրով նախատեսված աշխատանքներից ԿԳ նախարար Ա. Աշոտյանը կարևորել է հատկապես ավագ դպրոցների հիմնանորոգման ու կրթակարգի վերանայման խնդիրները:
Բանկի ներկայացուցիչները նշել են, որ այցի ընթացքում նպատակ ունեն ամփոփել «Կրթության որակ և համապատասխանություն» երկրորդ վարկային ծրագրի փակման հաշվետվությունը: Հանդիպման ընթացքում քննարկվել են նաև աշխատանքային մի շարք այլ հարցեր: