ԵՄ-ն միգրանտների օգնության համար կստեղծի քաղաքացիական պաշտպանության մեխանիզմ
26-10-2015 13:19:55 | | Միջազգային
Եվրոպական ֆինանսական հաստատությունները պատրաստ են միջոցներ տրամադրել միգրացիոն ճգնաժամի հաղթահարման համար: Այս մասին գրում է lenta.ru-ն` վկայակոչելով ТАСС-ին:
Աղբյուրի տեղեկացմամբ` Եվրահանձնաժողովի ղեկավար Ժան Կլոդ Յունկերը ԵՄ գագաթաժողովի արդյունքերով հայտարարել է, որ ԵՄ-ն կստեղծի «քաղաքացիական պաշտպանության» սեփական մեխանիզմը միգրանտներին անհրաժեշտ օգնություն ցուցաբերելու համար:
«Մեր գլխավոր հումանիտար որոշումն այն է, որ փախստականներին տանիք տրամադրենք: Անթույլատրելի է, որ ժամանակակից Եվրոպայում մարդիկ գիշերեն փողոցում: ԵՄ-ն քաղաքացիական պաշտպանության իր մեխանիզմը կգործարկի օգնություն ցուցաբերելու համար»,- նշել է նա:
Յունկերը հայտարարել է, որ բոլոր փախստականները պետք է գրանցվեն Հունաստանի հատուկ կենտրոններում, իսկ ներկայիս միգրացիոն ճգնաժամն անվանել ամենադժվար մարտահրավերը, որի հետ վերջին դարում բախվել է ԵՄ-ն: Միևնույն ժամանակ նա ընդգծել է, որ Եվրամիության առաջնորդներն ունեն համայնքային հարցերի մասին պատկերացումներ և ցանկություն դրանք համատեղ լուծելու:
Իր հերթին Գերմանիայի կանցլեր Անգելա Մերկելը հաղորդել է, որ ԵՄ երկրներն ամեն շաբաթ փախստականների մասին տեղեկություններ կտրամադրեն Եվրահանձնաժողովին: Նա նաև նշել է, որ Բալկաններում ժամանակավոր ճամբարներում փախստականների համար կստեղծվի 50 հազար նոր տեղ:
Այդուհանդերձ Ա. Մերկելը շեշտել է, որ Պակիստանի, Բանգլադեշի և Աֆղանստանի տնտեսական միգրանտները, որոնք քաղաքացիական ապաստանի թույլտվություն չունեն, պետք է վերադառնան իրենց հայրենիք:
ՀԱՅԵՐԵՆ
Русский
English
Դաս. հայերեն
French
