Ժամանակակից չորս հայ գրողներ արժանացան «Հրանտ և Մանուշակ Սիմոնյաններ» գրական մրցանակի

12-11-2015 18:49:00 | Հայաստան | Նոր գրքեր

Հրապարակախոսություն, արձակ և պոեզիա անվանակարգերում ժամանակակից չորս հայ գրողներ արժանացան «Հրանտ և Մանուշակ Սիմոնյաններ» գրական մրցանակների:

Ինչպես նոյեմբերի 12-ին կայացած մրցանակաբաշխության ժամանակ նշեց Հայաստանի «Գրողների միության» նախագահ Էդվարդ Միլիտոնյանը, արդեն տասը տարի է, ինչ ամերիկահայ բարերարներ Հրանտ և Մանուշակ Սիմոնյանները համանուն հիմնադրամի ֆոնդից իրենց ֆինանսական աջակցությունն են ցուցաբերում հայ գրողներին:

Հրապարակախոսություն անվանակարգում «Հրանտ և Մանուշակ Սիմոնյաններ» գրական մրցանակի արժանացած բանաստեղծուհի, հրապարակախոս Նանեն «Նոյյան Տապանի» թղթակցի հետ զրույցում նշեց, որ 2015 թվականին լույս տեսած «Ջրհոսի դարաշրջանի դավադրությունը» գիրքն ամփոփում է վերջին տարիներին մամուլում իր կողմից պարբերաբար հրապարակված էսսեների և հրապարակախոսությունների մի մասը:

Նրա փոխանցմամբ` գրքում տեղ գտած նյութերը վեր են հանում ազգի, մարդկության, երկրի և մոլորակի դեմ ծառացած հայտնի և անհայտ բազմաթիվ խնդիրներ, որոնց մասին ժամանակն է բացահայտորեն խոսելու:

Արձակ անվանակարգում «Կապույտ հազ» գրքի համար գրական մրցանակի արժանացավ գրող Հակոբ Հարությունը:

Վերջինս արևելահայ գրականության մեջ առաջին անգամ անդրադարձել է հայ ժողովրդի ազգային-ազատագրական շարժման գործում կամավորական հայ լեգեոնականի կերպարին, որի կենսագրությունը դարձել է եղեռնազարկ գերդաստանի շարունակվող տարեգրություն: Գեղարվեստական պատումը լրացված է փաստավավերագրական նյութերով:

«Ուրախ եմ, որ այսօր գնահատվեց անցյալ դարի մի ամբողջ ազգային-ազատագրական շարժման մահապարտների թափած արյունը, կյանքն ու եռանդը, որը, ցավոք սրտի, վերջին հարյուրամյակում մոռացության է մատնված»,- ասաց Հ. Հարությունը` հավելելով, որ ստացած մրցանակը խորհրդանշում է հայ գրողների խոնարհումն այդ հերոսների հիշատակի առջև:

Պոեզիայի անվանակարգում մրցանկակիրները երկուսն էին` Նորայր Ենգիբարյանը` «Իրեր և իրավիճակներ» բանաստեղծությունների գրքի և Գագիկ Դավթյանը` «Վարք Բաբիկի`Որդվո սյունյաց իշխան Անդովկի» պոեմի համար:

Ն. Ենգիաբարյանի փոխանցմամբ` իր գրքով նա շարունակել է պարզ, առօրյա երևույթների ու իրերի մեջ տեսնել բանաստեղծականն ու արտահայտել այն խոսակցական ձևով` համեմված նուրբ հումորով:

Գիրքը հրատարակվել է պետական աջակցությամբ` «Ծիծեռնակ» հրատարակչությունում:

«Վարք Բաբիկի`Որդվո սյունյաց իշխան Անդովկի» պոեմի հեղինակի տեղեկացմամբ` մեկ ամիս առաջ լույս տեսած իր գիրքը հայոց Փառանձեմ թագուհու եղբոր` Անդովկ իշխանի որդի Բաբիկի պոետական վարքագրությունն է:

Ամփոփելով մրցանակաբաշխությունը` ՀԳՄ նախագահը ընդգծեց, որ վերոնշյալ ամենամյա մրցանակաբաշխությունը մեծ խթան է հանդիսանում գրական ասպարեզում լավագույն աշխատանքները նշմարելու և ընթերցողներին հասցնելու համար:

Է. Միլիտոնյանի տեղեկացմամբ` բարերար Հրանտ Սիմոնյանը հայ գրողներին մշտապես ցուցաբերած իր աջակցության համար արժանացել է ՀՀ մշակույթի նախարարության Գրիգոր Նարեկացի մեդալին, որն առաջիկայում կփոխանցվի տիրոջը:

Մրցանակաբաշխության ներկանները ևս իրենց երախտիքի խոսքը հղեցին ԱՄՆ-ում բնակվող հայ բարերարին` նախապես շնորհավորելով նրան ծննդյան 90-ամյակի կապակցությամբ:

Լուսանկարներն այստեղ

Էլիզա Զախարյան, «Նոյյան Տապան»

Տեսանյութերը և լուսանկարները` Մերի Հունանյանի, «Նոյյան Տապան»

Նոյյան տապան - Նոր գրքեր