Զբոսաշրջիկների համար նախատեսված տիեզերանավը կփորձարկվի 2016-ին

08-12-2015 18:17:40 | ԱՄՆ | Գիտություն եւ տեխնոլոգիաներ

Ամերիկյան XCOR ընկերությունը մտադիր է 2016 թվականին փորձարկել նոր Lynx տիեզերանավը, որը հետագայում կօգտագործվի տիեզերք զբոսաշրջիկների տեղափոխության համար:

Ինչպես տեղեկացնում է Interfax.ru-ն` վկայակոչելով Aviation Week-ին, կոնկրետ ժամկետներ դեռևս նշված չեն, սակայն Lynx-ի ամառային փորձարկումները նախատեսվում է սկսել գալիք տարվա երկրորդ կիսամյակում:

Տիեզերանավի փորձարկումները կանցկացվեն Մոհավե անապատում պատրաստված հատուկ թռիչքուղու վրա: Ամառային փորձարկումների կենթարկվի տիեզերանավի երեք տարբերակներից առաջինը` Lynx Mk.1-ը:

Փորձնական թռիչքների ընթացքում սարքն աստիճանաբար կբարձրանա մինչև 60,9 հազար մետր: Փորձարկումների ավարտից հետո Lynx Mk.1-ը կօգտագործվի օդաչուների պատրաստման համար:

Ավելի ուշ, XCOR-ը կանցկացնի զբոսաշրջային տիեզերանավի երկրորդ տարբերակի` Lynx Mk.2-ի, փորձարկումները: Այն նախատեսվում է ստեղծել Քենեդիի Տիեզերական կենտրոնում Space Florida ընկերության հետ համատեղ: Այդ սարքը կկարողանա բարձրանալ մինչև 100 հազար մետր:

Lynx Mk.1 և Mk.2-ը հագեցած կլինեն XR-5K18 հրթիռային շարժիչներով: Որպես վառելիք օգտագործվելու է կերոսին և հեղուկ թթվածին:

XCOR-ը նաև մտադիր է ստեղծել տիեզերանավի երրորդ տարբերակը` Lynx Mk.3-ը:

Բացի զբոսաշրջիկների տեղափոխությունից, այն կկարողանա ուղեծիր դուրս բերել փոքրիկ արբանյակների, որոնք կամրացվեն տիեզերանավի քթային հատվածում:

Ենթադրվում է, որ տիեզերանավի բոլոր երեք տարբերակները թռիչքներ և վայրէջքներ կկատարեն Երկրի վրա տեղակայված օդանավակայանում:

Նոյյան տապան - Գիտություն եւ տեխնոլոգիաներ

Կարդացել են 841 անգամ

Զբոսաշրջիկների համար նախատեսված տիեզերանավը կփորձարկվի 2016-ին

Noyan Tapan TV