Մերձավանում առաջին անգամ մեծ շուքով ազդարարվեց Ամանորյա միջոցառումների մեկնարկը. (տեսանյութեր)

28-12-2015 14:19:19 | Հայաստան | Բարեգործություն

Մերձավանում առաջին անգամ մեծ շուքով ազդարարվեց ամանորյա միջոցառումների մեկնարկը: Տոնական լույսերով զարդարված Մերձավանի գլխավոր այգում կայացավ մեծ համերգ` հայտնի մուլտհերոսների, Ձմեռ Պապերի և Ձյունանուշների մասնակցությամբ. վերջիններս համյանքի փոքրիկներին հանձնեցին շուրջ 350 ամանորյա նվերներ:

Մերձավանցիների համար տոնական ուրախ և բարձր տրամադրության ապահովողը Մերձավանի բնակիչ Գագիկ Ախտոյանն էր, ով դեռ տարեկսզբին սեփական միջոցներով բարեկարգել էր Մերձավանի կենտրոնական այգին` այնտեղ տեղադրելով Հայոց Ցեղասպանության 100-րդ տարելիցին նվիրված Խաչքար-հուշարձան:

Ինչպես «Նոյյան Տապան»-ի թղթակցի հետ զրույցում նշեց Գ. Ախտոյանը, տոնական միջոցառումների նպատակն է համախմբել ու ուրախացնել համայնքի բնակիչներին:

«Ճիշտ է, առաջին անգամ է նման տոնական միջոցառում անցկացվում, սակայն այն շարունակական է լինելու»,- ասաց Գ. Ախտոյանը:

Վերջինս, շնորհավորելով համայնքի և համայն հայության գալիք Ամանորն ու Սուրբ Ծնունդը, նշեց. «Ուզում եմ սրտանց շնորհավորել ինչպես մերձավանցիներին, այնպես էլ ամբողջ հայությանը գալիք տոների կապակցությամբ` նրանց մաղթելով առողջություն, երջանկություն. թող իրականանան բոլորի երազանքները»:

«Նոյյան Տապանի» հետ իրենց տպավորություններով կիսվեցին նաև գյուղի բնակիչները. նրանցից Աստղիկը, ով Մերձավանում հարս է եկել Գյումրիից, առանձնակի ոգևորությամբ նշեց. «Շատ ուրախ եմ հենց Մերձավանում մասնակցելու նման տոնական միջոցառման, որին կարող եմ ներկա գտնվել ամուսնուս և բալիկիս հետ. Ցանկալի է, որ դրանք շարունակական լինեն, որովհետև թեկուզ մեկ օրով կտրվում ենք կենցաղային հոգսերից»,-ասաց նա` շնորհակալություն հայտնելով միջոցառման կազմակերպիչ Գ. Ախտոյանին և նրա որդիներին:

Նրա փոխանցմամբ` Ամանորին պատրաստվում են ինչպես բոլորը, ավանդական ձևով պատրաստելու են համեղ և միայն հայկական ավանդական ուտեստներ, որոնցով զարդարելու են ամանորյա սեղանները: