Հավային Ճանաչել է Լեռնային Ղարաբաղի Հանրապետության Անկախությունը
30-03-2016 16:13:18 | ԱՄՆ | Քաղաքական
-Միաձայն Քվեարկություն եւ Արցախի Ազատությանն Ուղղված Հնչեղ Աջակցություն` Միացյալ Նահանգներ Ադրբեջանի Նախագահ Ալիեւի այցի նախօրեին
Հոնոլուլու, Հավայի - Հավային դարձավ ԱՄՆ յոթերորդ նահանգը, որ համախմբվեց ի աջակցություն Արցախում ժողովրդավարական զարգացումների եւ ժողովրդի ինքնորոշման իրավունքի, եւ միաձայն քվեարկեց ` ճանաչելով Լեռնային Ղարաբաղի Հանրապետությունը, հայտնում են Ամերիկայի Հայ Դատի Հանձնախմբի Արեւմտյան Շրջանից:
Հավայիի Ներկայացուցիչներ Տան 167 բանաձեւն ընդունվեց` չնայած Ադրբեջանի դեսպանատան կողմից օրինագծի տապալմանն ուղղված հսկայական ճնշումների: Գլխավոր քվեարկությունը տեղի ունեցավ Ադրբեջանի նախագահ Իլհամ Ալիեւի` Վաշինգտոն այցից 24 ժամ առաջ, որտեղ նա պետք է միանա նախագահ Օբամային եւ աշխարհի այլ առաջնորդների` միջուկային գագաթաժողովի շրջանակներում:
Պատմական քվեարկությունը հատկապես քաջալերում է Արցախի` (Լեռնային Ղարաբաղի) որպես ազատ ու անկախ պետություն զարգանալու շարունակական ջանքերը, եւ պաշտոնական կոչ է ուղղում միջազգային հանրությանը`ճանաչել Լեռնային Ղարաբաղի Հանրապետությունն որպես ազատ, անկախ, եւ ինքնիշխան ժողովրդավարական երկիր:
«Այսօր Հավայիի ժողովուրդը զորակցում է Արցախի ժողովրդի ազատության եւ անկախության ձգտումներին` հաստատակամորեն դեմ լինելով այն զորեղ լոբբիստական շահերին, որոնք ուղղված են քայքայելու ժողովրդավարության եւ ինքնորոշման ամերիկյան եւ հայկական գլխավոր սկզբունքները: Մեր սրտագին երախտագիտությունն ենք հայտնում Ներկայացուցիչների Տան անդամ Անգուս ՄըքՔելվիին եւ Ջոն Միզունույին` առաջնորդելու համար Ներկայացուցիչների Տանն իրականացված աշխատանքները, եւ ստանձնելու համար նման աննկուն դիրքորոշում, մեր համայնքի հետ միասին», նշում է Ամերիկայի Հայ Դատի Հանձնախմբի Արեւմտյան Շրջանի տնօրեն Էլեն Ասատրյանը:
Միացյալ Նահանգներում Լեռնային Ղարաբաղի Հանրապետության Ներկայացուցիչ Ռոբերտ Ավետիսյանն ողջունել է որոշումը` նշելով, «Ես երախտապարտ եմ Հավայիի նահանգային խորհրդարանի Ներկայացուցիչների Տանը, անդամներ` ՄըքՔելվիին, Միզունոյին եւ նրանց բոլոր գործընկերներին, ովքեր աջակցել են այս շարժմանը: Նրանք ամրապնդել են արցախիների վստահութունն առ այն, որ մեր հաջողություններն աննկատ չեն անցնում, եւ որ ազատ ու անկախ Լեռնային Ղարաբաղի Հանրապետությունը վերջապես կճանաչվի որպես այդպիսին ողջ աշխարհի քաղաքակիրթ համայնքի կողմից»:
Ավետիսյանն ու Ասատրյանը շնորհակալություն են հայտնել համայնքի ներկայացուցիչ Արթուր Արթենյանին, ով ջանասիրաբար աշխատել է օրինագծի անցկացման ուղղությամբ` Հավայիում աճող հայ բնակչության աջակցությամբ: 2014թ-ին, տեղական համայնքի ջանքերով, Հավայիի օրենսդիր մարմինը հանրային քննարկում սկսեց եւ մերժեց Ադրբեջանի կողմից նախաձեռնված հակահայկական օրինագծեր` արգելափակելով ԱՄՆ օրենսդիրներին Հայաստանի եւ Լեռնային Ղարաբաղի դեմ իրենց թշնամական արշավում ներգրավելու Բաքվի լավ ֆինանսավորված ջանքերը: Արթենյանն ու Ռուդի Դեքեմերջյանը ներկա էին նահանգային խորհրդարանում` օրինագծի ներկայացման եւ քվեարկության ժամանակ:
167 բանաձեւի քվեարկությանը նախորդող օրերին, Հայ Դատի Հանձնախմբի Արեւմտյան Շրջանից աշխատանքներ էին տարվել` Արթենյանին եւ Ներկայացուցիչների Տան օրենսդիրներին տեղեկացնելու երկու տասնամյակների ընթացքում Արցախում տեղի ունեցած ժողովրդավարական զարգացումների ու տնտեսական առաջընթացի մասին` Ադրբեջանի ռազմական հարձակումների ֆոնին, որոնք իրենց բարձրակետին հասան 2015թ-ին:
Այսպիսով, Հավային միացավ Ռոդ Այլենդին, Մասաչուսեթսին, Լուիզիանային, Մեյնին, Կալիֆորնիային և Ջորջիային` ընդունելով օրենք, որն աջակցում է Արցախի անկախությանը: Բանաձեւին ամբողջությամբ կարելի է ծանոթանալ առցանց, հետեւյալ կայքում` https://legiscan.com/HI/text/HR167/id/1378938:
Հայ Դատի Հանձնախմբի Արեւմտյան Շրջանը, ամենամեծ եւ ամենաազդեցիկ կազմակերպությունն է Արեւմտյան Ամերիկայում: Համագործակցելով ցանցային գրասենյակների, մասնաճյուղերի, աջակիցների ու համախոհ կազմակերպությունների հետ, Հայ Դատի հանձնախումբը ողջ երկրում արծարծում է ամերիկահայ համայնքի շահերը բազմաթիվ հարցերի շուրջ: