«Առավոտ». Թեեւ Կրեմլի քաղաքականության քարոզիչ, ռուս հայտնի հեռուստամեկնաբան Դմիտրի Կիսելյովի հիմնադրած երեւանյան «Գրիբոյեդով» ակումբի կայքում  նաեւ Հայաստանի քաղաքագետների միության նախագահ Հմայակ Հովհաննիսյանի անունը եւս կա, սակայն նա լրիվ այլ կարծիքի է այդ մասին:

 

«Ասել, որ Հայաստանի քաղաքագետների միության նախագահը կարող է ինչ-որ վերազգային կազմակերպությունների անդամակցել՝ լուրջ չէ: Եթե դուք նկատի ունեք իմ ընկերական ազդեցիկ շրջապատը Մոսկվայում, որտեղ ես գերազանցությամբ ավարտել եմ Մ.Լոմոնոսովի անվան պետհամալսարանի փիլիսոփայության ֆակուլտետը և ասպիրանտուրան, պաշտպանել եմ գիտական թեզեր, 1994 – 1996 թթ աշխատել եմ ՝ որպես հրավիրված փորձագետ, ՌԴ ՊետԴումայի խորհրդին կից՝ Անդրկովկասի գծով գլխավոր փորձագետի պաշտոնում, 1995 թ նախապատրաստել եմ Դումայում խորհրդարանական լսումներ ղարաբաղյան կարգավորման թեմայով, մշակել եմ Դումայի կողմից միաձայն ընդունված Հայոց ցեղասպանության ճանաչման և դատապարտման մասին հայտնի բանաձևը, ապա ես դա հաստատում եմ: Հաստատում եմ նաև այն, որ եթե վերջին հինգ տարիների ընթացքում հանրապետականների ներկայիս վարչախումբը ծանր հարվածներ չհասցներ ինձ և ՀՔՄ-ին, ինձ անողոքաբար քարշ չտար դատարաններով, ապա ես կկարողանայի կենտրոնանալ իմ կապերը և հնարավորությունները Մոսկվայում ի նպաստ Արցախի օգտագործելու խնդրի վրա, ինչպես դա արել եմ 90-ական թվականներին: Իսկ հիմա ես ստիպված եմ իմ թանկարժեք ժամանակի առյուծի բաժինը վատնել անարդար, ռեկետի գործիքի վերածված դատարանների ու հարկադիր կատարողների հետ կռիվ տալով: Եթե դուք հայտնաբերեք մի նոր Գրիբոյեդովի, որը ինձ այդ գործում կօգնի, ես ձեզանից շատ շնորհակալ կլինեմ: Բայց, հավատացեք ինձ, պարսկական տիրակալի զոհերին փրկելն ավելի հեշտ գործ է, քան մեր քրեաօլիգարխիկ իշխանություններից եւ նրանց կամակատար դատարաններից քաղաքացուն ազատելը»,- Aravot.am-ին ասաց քաղաքագետը: Երբ կրկին հիշեցրինք, որ իր անունը որպես անդամ «Գրիբոյեդով» ակումբի կայքում կա, Հովհաննիսյանը նեղսրտեց` մեզ մեղադրելով ստալինա-բերիական ավանդույթին տուրք տալու մեջ, նշելով, որ «ընկերներով պարբերաբար հավաքվելը» կազմակերպության անդամ լինել չէ: «Դուք նույնպես կարող եք ձեր ֆեյսբուքյան էջում կամ ձեր թերթի կայքում տեղադրել իմ լուսանկարը և գրել, որ ես պարբերաբար շփվում եմ ձեր էջի կամ թերթի հետ: Բայց դա, իհարկե, չի նշանակում, որ ես ձեր թերթի կամ էջի «անդամն եմ»: Անդամության ինստիտուտը վերաբերվում է գրանցված կազմակերպություններին, այլ ոչ թե ընկերական շփումներին»,- ասաց Հմայակ Հովհաննիսյանը: Նա այդպես էլ չպատասխանեց այն հարցին՝ արդյոք, իր ձեւակերպմամբ, «ընկերներով հավաքվելիս» երբեւէ քննարկվել են Ռուսաստանի՝ Ադրբեջանին զենք վաճառելը կամ ասենք Արցախյան խնդրին վերաբերող հարցեր: 

 

Նոյյան տապան  -   Ի՞նչ է գրում մամուլը