Լույս է տեսել Օլգա Սարգսյանի քիմիայի ձեռնարկը բուհի դիմորդների, նախապատրաստական բաժինների սովորողների և ավագ դպրոցի աշակերտների համար

28-04-2016 17:31:44 | Հայաստան | Նոր գրքեր

Լույս է տեսել քիմիական գիտությունների թեկնածու, դոցենտ Օլգա Սարգսյանի հեղինակած «Քիմիա: Ձեռնարկ բուհի դիմորդների, նախապատրաստական բաժինների սովորողների և ավագ դպրոցի աշակերտների համար» ձեռնարկը, որը բարձր գնահատականի է արժանաել մասնագետների կողմից:

Ինչպես գքրի նախաբանում նշել է քիմիական գիտությունների դոկտոր, պրոֆեսոր Մ. Երիցյանը, սույն ձեռնարկն «իր բովանդակությամբ և կարևորությամբ կարող է դասվել լավագույնների շարքում»: Նրա փոխանցմամբ, ձեռնարկն ընդգրկում է ընդհանուր, անօրգանական և օրգանական քիմիայի բաժինները: Դրա ստեղծման համար հիմք է ծառայել հեղինակի կողմից գրված և 2000թ. հրատարակված ձեռնարկը:

Ըստ պրոֆեսոր Երիցյանի, քիմիայի ժամանակակից ծրագրին համապատասխան վերամշակված և լրացված են նորագույն փոփոխությունները, պահանջները: Նյութը շարադրվել է փոփոխելով որոշ թեմաների հաջորդականությունը, որի շնորհիվ առավել դյուրին և հիմնավոր կդառնա ուսուցանվող թեման՝ բացառելով մեխանիկական յուրացումը: Նախորդ թեման յուրացնելուց հետո սովորողը կկարողանա կառուցել հաջորդ՝ նոր թեմայի պատճառա-հետևանքային, իմաստային կապը:

Ձեռնարկի տեսական հարցերի համապատասխան բաժիններում լուսաբանված քիմիական պրոցեսների խորը վերլուծությունը ամրագրված է վարժությունների և խնդիրների լուծումներով:

Յուրաքանչյուր թեմայի վերջում առաջադրված են հանձնարարություններ, ամփոփիչ հարցեր, վարժություններ և խնդիրներ ինքնուրույն աշխատանքի համար:

Նոյյան տապան - Նոր գրքեր