Վայոց Ձորի կենսաբազմազանությամբ հարուստ բնաշխարհում անցկացվեց էկոտուրիզմի առաջին փառատոնը (տեսանյութ եւ ֆոտոշարք)

09-06-2016 16:32:36 | Հայաստան | Ականատեսի աչքերով

Հայաստանում էկոզբոսաշրջությունը զարգացնելու նպատակով օրերս Վայոց Ձորի Գոմք և Մարտիրոս համայնքներում անցկացվեց էկոտուրիզմի առաջին փառատոնը: Շատերի համար դեռևս անհայտ այս երկու կենսաբազմազանությամբ հարուստ բնակավայրերում փառատոնի մասնակիցները բացառիկ հնարավորություն ունեցան մասնակցելու ամենատարբեր միջոցառումների` սիրողական հեծանվային մրցումներից մինչև էկոերթուղիներով քայլարշավներ, ձիարշավներ, ժայռամագլցումներ և գյուղատնտեսական արտադրանքի ցուցահանդես-վաճառք:

Երկօրյա աննախադեպ փառատոնի շուրջ 400-ից ավելի հյուրերին ու գյուղացիներին համախմբել էին «Երիտասարդ կենսաբանների ասոցիացիա» և «Ջերմուկի զարգացման կենտրոն» հասարակական կազմակերպությունները:

Ավելի վաղ, «Նոյյան Տապանի» մամլո սրահում տեղի ունեցած ասուլիսի ընթացքում «Երիտասարդ կենսաբանների ասոցիացիա» Հասարակական կազմակերպության փոխնախագահ Սարգիս Աղայանը նշել էր, որ փառատոնի նպատակն է այդ կերպ զբոսաշրջային մեծ հոսք ուղղել այդ համայնքներ` հնարավորություն ստեղծելով տեղաբնիկների համար զբոսաշրջությունից որոշակի ֆինանսական եկամուտներ ունենալ:

255 բնակչից բաղկացած գյուղի համայնքապետի խոսքերով` փառատոնի հաջողված լինելուց և արդյունքներից է կախված նաև Գոմք բերող ճանապարահատվածի վերանորոգման հարցի լուծումը:

Կազմակերպիչները հույս ունեն, որ առաջին անգամ անցկացվող փառատոնը կդառնա ավանդական և կունենա լայն տարածում` ընդգրկելով ինչպես տեղի, այնպես էլ օտարերկրյա զբոսաշրջիկներին:

Էլիզա Զախարյան, «Նոյյան Տապան»

Տեսանյութը և ֆոտոշարքը` «Նոյյան Տապան»-ի

Նոյյան տապան - Ականատեսի աչքերով