Թուրքիայում գործարարությամբ զբաղվող հայ գործարարին Հայաստանում ռիսկերը չեն վախեցնում
15-07-2016 14:26:01 | Հայաստան | Ի՞նչ է գրում մամուլը
Երևանում անցկացվող «Երիտասարդ գործարարների համահայկական ֆորումի» մասնակից, 34 տարի Թուրքիայում գործարարությամբ զբաղվող Օնիկ Կոլուկիսայանը մտադրվել է բիզնեսը տեղափոխել հայրենիք:
Լրագրողների հետ զրույցում գործարարը նշեց, թե արտադրում է կանացի և տղամարդու կաշվե պայուսակներ, որոնք արտահանում է Իտալիա, ԱՄՆ, Հոլանդիա, նաև Թուրքիայում է վաճառվում:
«Բայց Թուրքիա չեմ ուզեր ալ շարունակել այս գործը, այլ կուզեմ Հայաստան գործել, որովհետև Թուրքիա օրեցօր լավ չի ըլլա»,-ասաց նա և հավելեց, թե «սիրիացիները շուկան վերացրել են», և հայերի համար այդ ոլորտում խնդիրներ առաջացրել:
Լրագրողները հարցրին, թե բիզնեսը տեղափոխելուց առաջ հետաքրքրվե՞լ է արդյոք Հայաստանում առկա ռիսկերից։
«Ոչ, բարեկամներ ունիմ, անոնցեն պիտի սովրիմ»,-ասաց նա և նշեց, թե շուկան էլ դեռ չի հասցրել ուսումնասիրել. «Տակավին նոր եկա»:
Ազգությամբ հայ գործարարին Հայաստանում ռիսկերը չեն վախեցնում, քանի որ Թուրքիայում արդեն իսկ գործել է ռիսկային պայմաններում: «Մենք Թուրքիայում արդեն հայ ըլլալու համար ռիսկի մեջ ենք, հիմա ավելի բազմություն Թուրքիայի մեջ կա, մենք հայ ըլլալով՝ ավելի փոքր ենք, սիրիացիները ավելի շատ են»,-ասաց նա:
Նա նշեց, որ Թուրքիայում գործում է ոչ հայկական անվամբ՝ խուսափելով հնարավոր դժվարություններից: