Գերմանիան և նրա գործընկերները չեն պատկերացնում խաղաղ Սիրիա նախագահ Ասադի գլխավորությամբ
05-09-2016 12:16:25 | Գերմանիա | Միջազգային
Գերմանիան և նրա գործընկերները կարծում են, որ հնարավոր չէ նախագահ Բաշար Ասադի գլխավորությամբ խաղաղ Սիրիա կառուցել: tass.ru-ի փոխանցմամբ` այդ մասին հայտարարել է Գերմանիայի արտգործնախարար Ֆրանկ Վալտեր Շտայնմայերը:
Վերջինս նշել է, որ Մոսկվայի միջամտությունը Սիրիայում ստեղծված իրավիճակին կայունացրել և ամրապնդել է սիրիացի նախագահի ռեժիմը: «Դա ոչինչ չի փոխում մեր և մեր գործընկերների դիրքորոշման մեջ, համաձայն որի մենք չենք կարող պատկերացնել խաղաղ Սիրիա Ասադի գլխավորությամբ»,- ասել է Շտայնմայերը:
Նա հույս է հայտնել, որ Ռուսաստանը և ԱՄՆ-ն Սիրիայի հակամարտության լուծման հարցում կհասնեն որոշակի պայմանավորվածությունների:
Նրա խոսքերով` Ռուսաստանը ներկայումս կարող է ցույց տալ, թե իրապես շահագրգռված է Սիրիայում կրակի դադարեցման հարցում:
Շտայմնայերը նաև նշել է, որ Մոսկվայում և այլուր քաջ գիտակցում են, որ Սիրիայի հակամարտությունը ռազմական ճանապարհով չի կարող լուծվել: