ՄԱԿ-ը հումանիտար օգնություն է հասցրել Իրաքի 30 հազարից ավելի բնակիչներին
06-09-2016 16:33:28 | | Հասարակություն
Իրաքյան Էլ Քայար քաղաքի ավելի քան 30 հազար բնակիչները վերջին երկու տարվա ընթացքում առաջին անգամ ՄԱԿ-ի Պարենի համաշխարհային ծրագրի աշխատակիցներից սննդամթերքի օգնություն են ստացել:
Interfax.ru-ի փոխանցմամբ` կազմակերպության հայտարարությունում նշվում է, որ հումանիտար օգնության փոխանցումը հնարավոր է դարձել միայն այն բանից հետո, երբ իրաքցի զինվորականները քաղաքից դուրս են շպրտել «Իսլամական պետություն» ահաբեկչական խմբավորման զինյալներին:
ՄԱԿ-ում նշել են, որ քաղաքը լրջորեն տուժել է մարտական գործողությունների արդյունքում, ինչը հանգեցրել է սննդամթերքի մատակարարման խափանումների:
«Քաղաքի խանութները կամ ավերված են, կամ փակվել են: Սննդի պահուստային միջոցները նվազել են այն դեպքում, երբ բնակչությունը գոյատևել է միայն պահուստային սննդի շնորհիվ, որը մնացել է վերջին բերքահավաքից:
Փաստաթղթում նաև նշվում է, որ խմելու ջրի, էլեկտրականության և բժշկական օգնության հասանելիություն դեռևս չկա:
Իրաքի բանակը այս տարվա օգոստոսի վերջին հայտարարել էր ԻՊ զինյալներից Էլ Քայար քաղաքի ազատագրման մասին: