Հայաստանում եզակի այս սենյակները յուրահատուկ կրթական անկյուններ են, որոնք բացի ուսումնական իրենց նշանակությունից, նաև անվտանգ տարածքներ են՝ հետաքրքիր լուծումներով: Ծրագրի հիմնական նպատակն է այս տարածաշրջանում ապրող երեխաներին ու երիտասարդներին հնարավորություն տալ ապահով ու տեխնոլոգիապես հագեցած տարածքում օգտվել ժամանակակից կրթական միջավայրի առավելություններից:
Հայաստանի մանուկներ հիմնադրամի գործադիր տնօրեն Անուշ Եդիգարյանը ողջույնի խոսքում նշեց. «ՍՄԱՐԹ ապահով սենյակները նախագծված են այնպես, որ անհրաժեշտության դեպքում ապաստարան դառնան համայնքի բնակիչներին, այնուամենայնիվ, մենք հույս ունենք, որ այն ծառայելու է խաղաղ ժամանակներին ու երեխաների համար նորագույն գիտելիքներ, հմտություններ ստանալու օջախ է դառնալու»։
ՍՄԱՐԹ ապահով սենյակների ծրագրային բովանդակությունը տարբերվում է Լոռու մարզում հիմնադրված և գործող ՍՄԱՐԹ սենյակներից նրանով, որ հատուկ շեշտադրում ունի անվտանգության ուսուցման մասով: Դասընթացների հիմնական մասնակիցները կլինեն միջին ու բարձր դասարանցիները, կներգրավվեն նաև դպրոցը և նույնիսկ բարձրագույն ուսումնական հաստատություններն ավարտած երիտասարդները: Այդուհանդերձ, կրթական այս միջավայրում ծրագրային ցանկից կարող են օգտվել նաև մեծահասակները:
Ներքոնշյալ ծրագրերը կազմում են ՍՄԱՐԹ ապահով սենյակների ծրագրային հենքը.
Կոթի համայնքի ղեկավար Ֆելիքս Մելիքյանը ևս կարևորեց ՍՄԱՐԹ սենյակում ապահովության համադրությունը կրթությանը՝ հույս հայտնելով, որ բազմաթիվ ընտանիքներ, ովքեր մտահոգված էին երեխաների զարգացման հարցերով, սրա շնորհիվ որոշում կկայացնեն չմեկնել Կոթիից։
Հայաստանի մանուկներ հիմնադրամի նպատակը Հայաստանի գյուղերը հզորացնելն է, սահմանամերձ համայնքներում երկարաժամկետ ու հիմնարար փոփոխություններ բերելը: Տավուշի սահմանային գյուղերում ծրագիր իրականացնելը Հիմնադրամի առաքելության ու ռազմավարության մի մասն է և այսօրվա ծրագրային հրատապ նպատակներից մեկը:
ՍՄԱՐԹ ապահով սենյակների բացման արարողությանը ներկա էին ՀՀ Արտակարգ իրավիճակների և Պաշտպանության նախարարությունների, միջազգային կազմակերպությունների ներկայացուցիչներ, հասարակական կազմակերպություններ, տեղական իշխանություններն ու Հայաստանի մանուկներ հիմնադրամի գործընկերները։ Հայ առաքելական եկեղեցու Տավուշի թեմի առաջնորդ գերաշնորհ Բագրատ եպիսկոպոս Գալստանյանը տնօրհնեքի կարգ կատարեց ՍՄԱՐԹ ապահով սենյակների համար՝ բարձր գնահատելով Հիմնադրամի նախաձեռնությունն ու իրագործած գաղափարները։
***
Հայաստանի մանուկներ հիմնադրամը (COAF) բարեգործական կազմակերպություն է, որի նպատակն է բարձրացնել Հայաստանի գյուղաբնակների կյանքի որակը համայնքային զարգացման երեխայակենտրոն ծրագրերի միջոցով: Հիմնադրամի համակողմանի ծրագրային մոդելի իրագործումը սկսվել է 2004թ., և այդ ժամանակից ի վեր իրականացվում են կրթական, առողջապահական, սոցիալական և տնտեսական ծրագրեր, ինչպես նաև հիմնանորոգվում են համայնքների համար կենսական նշանակություն ունեցող ենթակառուցվածքները: Այս ծրագրերի շահառուներն են Հայաստանի Արմավիրի, Արագածոտնի, Լոռու, Գեղարքունիքի, Շիրակի և Տավուշի մարզերի 44 համայնքների ավելի քան 67,000 բնակիչները:
2015 թ. սկսած՝ COAF-ը մշակել և իրագործում է նոր տեսլական՝ ՍՄԱՐԹ նախաձեռնություն: ՍՄԱՐԹ-ը կրթության միջոցով առաջխաղացում է ապահովելու գյուղական աշխարհի համար, ինչի արդյունքում շահում են անհատները, հասարակությունը և միջավայրը: ՍՄԱՐԹ-ը կդառնա զարգացման օրինակելի մոդել և կկրկնօրինակվի Հայաստանի այլ մարզերում և համայնքներում:
ՀԱՅԵՐԵՆ
Русский
English
Դաս. հայերեն
French
