ՀՀ կառավարության շենքի դիմաց «մշտական» բողոքողներին միացել են բուքմեյքերները և վանաձորցիները (տեսանյութ)
06-10-2016 20:23:26 | Հայաստան | Հասարակություն
Հայաստանի Հանրապետության կառավարության շենքի առջև այսօր դարձյալ բողոքի ակցիաներ էին: Մշտական ցուցարարների կողքին իրենց բողոքի ձայնն են բարձրացնում «Եվրոֆուտբոլ» ընկերության 300 աշխատակիցները:
Նրանց դժգոհությունը կապված էր ընդունված Հարկային նոր օրենսգրքի անցումային դրույթներում պետական տուրքի մասին կատարված փոփոխության հետ, համաձայն որի` վիճակախաղերի և ինտերնետ շահումով խաղերի կազմակերպման լիցենզիաների պետական տարեկան տուրքն ավելացվել է 5 անգամ` 200 միլիոն դրամից հասնելով 1 միլիարդի:
Կառավարության շենքի առջև հավաքված բուքմեյքերները հանդիպում են պահանջում վարչապետ Կարեն Կարապետյանի հետ:
«Եվրոֆուտբոլ» ընկերության իրավաբանական գծով տնօրեն Մառլեն Սմբատյանի փոխանցմամբ` իրենք ունեն մի շարք առաջարկներ վերոնշյալ խնդրի արդյունավետ լուծման համար, որոնք պատրաստվում են նամակով հանձնել Կարեն Կարապետյանին:
Ցուցարարների համոզմամբ` ներկա պահին խնդրի նման լուծումը հանգեցնելու է աշխատատեղերի կրճատման, ընկերությունների լուծարման, արտագաղթի նոր ալիքի և ոլորտի մոնոպոլիզացման:
Վարչապետի հետ հանդիպում են պահանջում նաև Վանաձոր քիմպրոմի նախկին աշխատակիցները, ովքեր 2011 թվականից աշխատել են Վանաձոր քիմպրոմից առանձնացված, նորարարություններով զբաղվող «Րենջեր Էներջի» ընկերությունում, որն հետագայում լուծարվել է:
Նշյալ ընկերության նախկին աշխատակից Զորիկ Բաբաջանյանի տեղեկացմամբ` իրենք Կառավարության շենքի առջև հավաքվել են պատկան մարմիններից պահանջելու իրենց աշխատավարձերը և վերջնահաշվարկը:
Բանն այն է, որ Վանաձոր քիմպրոմի նախկին աշխատակիցները չեն ստացել 2011 թվականի վերջին չորս ամիսների իրենց աշխատավարձերը և վերջնահաշվարկը:
Դժգոհող վանաձորցիների պնդմամբ` աշխատավարձ չստացած աշխատակիցները 150 հոգի են, որոնցից հարյուրը դիմել են դատարան` իրենց աշխատավարձերի և վերջնահաշվարկի պահանջով: Դատարանը բավարարել է նրանց պահանջը, սակայն նրանից ոչ մեկ դեռևս աշխատավարձ չի ստացել:
Այս խնդրով խոստացել էր զբաղվել նախկին վարչապետ Հովիկ Աբրահամյանը, սակայն այժմ ցուցարարների վերջին հույսը նոր վարչապետն է:
Անփոփոխ են մնացել նաև հաշմանդամություն ունեցող թոշակառու օդաչուների պահանջները: Նրանք շարունակում են փոխհատուցում պահանջել աշխատանքային գործունեության ընթացքում ձեռք բերված հաշմանդամության համար:
Կառավարության շենքի առջև հավաքված ցուցարարներից միայն Կոնդ և Ֆիրդուս թաղամասերի անօթևան մնացած բնակիչներն են, որոնք այլևս ոչ մի հույս և ակնկալիք չունեն իշխանություններից: Միաժամանակ նրանք չեն հրաժարվում ամեն հինգշաբթի իրենց ներկայությամբ հիշեցնել պաշտոնյաներին սեփական գոյության մասին:
ՀԱՅԵՐԵՆ
Русский
English
Դաս. հայերեն
French
