Իսպանաբնակ գրողի «Փնտրտուքների ճանապարհին» գիրքն այսօր ներկայացվելու է հայ ընթերցողի դատին (տեսանյութ)

19-10-2016 14:42:27 | Հայաստան | Նոր գրքեր

Իսպանաբնակ հայ գրողի «Փնտրտուքների ճանապարհին» խորագրով գրքի շնորհանդեսը տեղի է ունենալու ինչպես Երևանում, այնպես էլ Սևանում, Հրազդանում, Դիլիջանում և Արցախում: Այս մասին հոկտեմբերի 19-ին լրագրողների հետ հանդիպման ժամանակ տեղեկացրեց գրքի հեղինակ, Իսպանիայի Վալենսիա քաղաքի «Արարատ» հայկական միության նախագահ, գրող, հրապարակախոս, պատմաբան, «Հայրենիք» շաբաթաթերթի հիմնադիր-խմբագիր իսպանաբնակ Արարատ Ղուկասյանը:

Վերջինս Հայաստանում է գտնվում ոչ միայն իր հեղինակած գրքի շնորհանդեսին, այլև Արցախում կայանալիք Լրագրողների համահայկական 8-րդ համաժողովին մասնակցելու համար:

Հայաստանում երկրորդ անգամ հրատարակվող «Փնտրտուքների ճանապարհին» գիրքն ըստ Ա. Ղուկասյանի` մանկության, սիրո, հայրենիքի, նաև խոհափիլիսոփայական բովանդակության բանաստեղծությունների ժողովածու է, որի հերոսը գտնվում է անվերջ փնտրտուքների մեջ:

«Գիրքը երկու անգամ հրատարակվել է նաև Մոսկվայում, իսկ 2014 թվականին շնորհանդեսներ են եղել Վալենսիայում, Բարսելոնայում, Մադրիդում, Էլդայում, Մոսկվայում, ինչպես նաև Երևանում և իմ ծննդավայր Հրազդանում»,- ասաց նա:

Ա. Ղուկասյանի խոսքերով` գրքի հերոսի փնտրտուքները դեռ շարունակվում են, և նախատեսում է դրանք ավարտել 2018 թվականին, երբ գրքում տեղ կգտնեն բոլոր այն ստեղծագործությունները, որոնք նախորդ հրատարակություններում չեն զետեղվել:

Իսպանաբնակ գրողը Հայաստանում մի շարք ծրագրեր ունի իրականացնելու, մասնավորապես, նա նախատեսում է Հայաստանի տարբեր քաղաքներում բացել Սերվանտեսի անվան անկյուններ, տեղադրել իսպաներեն գրքեր, որոնք հնարավորություն կտան իսպաներեն սովորել ցանկացող հայ երիտասարդներին առավել սերտորեն առնչվել իսպաներեն լեզվի և մշակույթի հետ, ինչպես նաև այդ կերպ նպաստել իսպանացի զբոսաշրջիկների հետաքրքրվածության բարձրացմանը Հայաստանի ու հատկապես մարզերի նկատմամբ:

«Ցավոք սրտի Իսպանիայի հետ դեռևս բարձրագույն մակարդակով դիվանագիտական հարաբերություններ չկան, մշակութային առումով աշխատում ենք կապեր ստեղծել»,- նշեց Ա. Ղուկասյանը` տեղեկացնելով, որ հաճախակի են կազմակերպում հայ ժամանակակից գրողների գրքերի շնորհանդեսները և իրականացնում հայաստանաբնակ արվեստագետների աշխատանքների ցուցադրություններն Իսպանիայի տարբեր քաղաքներում:

Նրա խոսքերով` հենց նմանատիպ համագործակցության արդյունք է նաև «Վիվարտ» մշակութային ՀԿ տնօրեն, գրող, հրապարակախոս Վարդուհի Գասպարյանի հետ ծանոթությունը, ում «Խոսուն լռություն» խորագրով գրքի շնորհանդեսն էլ Իսպանիայի Վալենսիա քաղաքում է տեղի ունեցել:

Անդրադառնալով Իսպանիայում լույս տեսնող «Հայրենիք» շաբաթաթերին` Ա. Ղուկասյանն ընդգծեց. ««Հայրենիք» շաբաթաթերը մինչ օրս առաջին և միակ հայալեզու թերթն է Իսպանիայում. աշխատում ենք, որպեսզի Իսպանիայում ապրող 10 հազար հայությունն ունենա այդ թերթը, որի միջոցով կծանոթանա թե Իսպանիայի ու Հայաստանի, թե աշխարհի ու Սփյուռքի նորություններին հայերեն լեզվով»:

Նրա տեղեկացմամբ` այսօր Իսպանիայում լրանում է իսպանաբնակ հայերին շաբաթվա մեջ մեկ ժամով բարի լույս մաղթող հայկական ռադիոժամի 1-ամյակը:

Նշենք, որ «Փնտրտուքների ճանապարհին» գրքի շնորհանդեսը Երևանում կայանալու է այսօր` հոկտեմբերի 19-ին, Պետական կամերային երաժշտական թատրոնում: Շնորհանդեսին երաժշտական կատարումներով հանդես են գալու «Վիվարտ» մշակութային կենտրոնի ծրագրերի համակարգող խորհրդի անդամներ, երգիչներ Արման Կարապետյանը և Էդգար Գևորգյանը:

Էլիզա Զախարյան, «Նոյյան Տապան»

Նոյյան տապան - Նոր գրքեր