Հայաստանը կողմ է տարածաշրջանում երկարատեւ խաղաղության ու
կայունության հաստատմանը
27-01-2010 15:22:00 | Հայաստան | Քաղաքական
ԵՐԵՎԱՆ, 27 ՀՈՒՆՎԱՐԻ, ՆՈՅՅԱՆ ՏԱՊԱՆ: Հայաստանի Ազգային
անվտանգության խորհրդի քարտուղար Արթուր Բաղդասարյանը հունվարի
27-ին ընդունել է ԵԱՀԿ պատվիրակությանը` Ղազախստանի քաղաքական
պլանավորման կոմիտեի նախագահ Տալգատ Կալիեւի գլխավորությամբ:
Տ.Կալիեւը ներկայացրել է Ղազախստանի կողմից ԵԱՀԿ
նախագահության ընթացքում իրականացվելիք քայլերը եւ ընդգծել, որ
որպես ԵԱՀԿ նախագահող երկիր Ղազախստանը հատուկ ուշադրություն է
դարձնում կովկասյան տարածաշրջանին:
Հանդիպման ընթացքում քննարկվել են ԵԱՀԿ շրջանակում Հայաստանի
եւ Ղազախստանի համագործակցությանը վերաբերող հարցեր:
Ա.Բաղդասարյանը վստահություն է հայտնել, որ Ղազախստանի
նախագահության շրջանում ԵԱՀԿ աշխատանքն ավելի կակտիվանա: Նա նշել
է, որ Հայաստանը կողմ է տարածաշրջանում երկարատեւ խաղաղության ու
կայունության հաստատմանը:
Տ.Կալիեւը տեղեկացրել է, որ փետրվարին տարածաշրջան, այդ
թվում` Հայաստան, կայցելի ԵԱՀԿ գործող նախագահը:
Ըստ ԱԱԽ-ի քարտուղարի մամուլի գրասենյակի, նույն օրը
Ա.Բաղդասարյանն ընդունել է Իրանի արտգործնախարար Մանուչեհր
Մոթաքիին:
Հանդիպմանը քննարկվել են երկկողմ համագործակցությանն առնչվող
հարցեր: Կողմերը կարեւորել են տարածաշրջանային անվտանգության
ամրապնդման ուղղությամբ հայ-իրանական համագործակցության
զարգացումը: Ա.Բաղդասարյանն ընդգծել է Հայաստան-Իրան երկաթգծի եւ
ավտոմայրուղու կառուցման, էներգետիկ ոլորտում առկա երկկողմ
պայմանավորվածությունների լիարժեք իրականացման կարեւորությունը:
Զրուցակիցներն անդրադարձել են նաեւ հայ-թուրքական
հարաբերությունների եւ ԼՂ հիմնախնդրի կարգավորման` վերջին շրջանի
զարգացումներին: Ա.Բաղդասարյանը ներկայացրել է այս խնդիրների
վերաբերյալ հայկական կողմի տեսակետը` վերահաստատելով, որ Հայաստանը
կողմնակից է տարածաշրջանում կայունության եւ խաղաղության
ամրապնդմանը, հարեւանների հետ հարաբերությունների կարգավորմանը: