Արդարադատության նախարարն ընդունել է «Կառուցողական երկխոսության հանձնառություն» ծրագրի պատասխանատուներին
28-12-2016 14:30:54 | Հայաստան | Իրավունք
Հայաստանի Հանրապետության արդարադատության նախարար Արփինե Հովհաննիսյանը, «Կառուցողական երկխոսության հանձնառություն» ծրագրի շրջանակներում, այսօր ընդունել է «Իրավաբանների հայկական ասոցիացիա» և գործընկերներ կազմակերպությունների ներկայացուցիչներին:
ԻՀԱ նախագահ, Ծրագրի ղեկավար Կարեն Զադոյանը ներկայացրել է ծրագրի թիրախային ոլորտներն ու նշել, որ նպատակը քաղհասարակության և պետական իշխանության միջև կառուցողական երկխոսության ձևավորումն ու Հայաստանում ՔՀԿ-ների ներուժի մեծացումն է:
Արդարադատության նախարարը ողջունել է նախաձեռնությունը, բարձր գնահատել քաղաքացիական հասարակության՝ հատկապես կոռուպցիայի դեմ պայքարի շրջանակներում ներդրված ջանքերն ու ծրագիրը հաջողելու և մեծ արդյունքներ արձանագրելու հույս է հայտնել: «Մենք միասին ենք քայլում և նույն ուղղությամբ ենք նայում»,- վստահեցրել է Արփինե Հովհաննիսյանը:
«Կառուցողական երկխոսության հանձնառություն» ծրագիրը կունենա դրամաշնորհային բաղադրիչ, որի շրջանակներում ենթադրամաշնորհներ կտրամադրվեն քաղաքացիական հասարակության կազմակերպություններին: Ծրագրի թիրախային ոլորտներն են արդարադատությունը, կրթությունը, բիզնեսը, տեղական ինքնակառավարումը և այլն:
Հանդիպման ավարտին կողմերը քննարկել են համագործակցության հետագա ուղղություններն ու ձևաչափը:
ՀԱՅԵՐԵՆ
Русский
English
Դաս. հայերեն
French
