Առաջ միայն Անկարան էր հովանավորում Արամ Աթեշյանին, այսօր նաև՝ Մայր Աթոռ Սուրբ Էջմիածինը. Սարգիս Հացպանյան (տեսանյութ)
25-02-2017 14:51:02 | Հայաստան | Հասարակություն
Առաջ միայն Անկարան էր հովանավորում Արամ Աթեշյանին, այսօր նաև՝ Մայր Աթոռ Սուրբ Էջմիածինը: Այսպես գնահատեց Մայր Աթոռ Ս. Էջմիածնում Կ.Պոլսի Պատրիարքության առկա հարցերի շուրջ ձեռք բերված ընդհանուր համաձայնության վերաբերյալ երեկ տարածված հաղորդագրությունը տարածաշրջանային հարցերով փորձագետ-վերլուծաբան Սարգիս Հացպանյանը:
Ըստ նրա՝ հայ եկեղեցու պատմության մեջ այս մեկ շաբաթում տեղի ունեցածն աննախադեպ է, քանի որ իրականության մեջ Մայր Աթոռի տարածած գրությունն անբովանդակ և ոչինչ չասող մի փաստաթուղթ է:
«Հարցին ոչ թե լուծում տրվեց, այլ հնարավոր լուծման ճանապարհը փակվեց, որովհետև դա գալիս է մեր եկեղեցու կանոնադրություն չունենալուց»,- ասաց Ս. Հացպանյանը` հավելելով, որ անգամ ՀԿ-ները և անհատ ձեռնարկություները կանոնադրություն ունեն, իսկ Հայաստանյաց առաքելական եկեղեցին չունի:
Նրա խոսքերով` Մայր Աթոռի կողմից տարծված գրության մեջ ասվում է բաներ, որոնք առանց այդ էլ այդպես պետք է լինեին, մինչդեռ պոլսահայ համայնքն Ամենայն հայոց կաթողիկոսից ակնկալում էր Ա. Աթեշյանի հրաժարականի պահանջը և այն, որ վերջինս տեղապահի ընտրություններում իր թեկնածությունը չի առաջադրի:
Ս. Հացպանյանի պնդմամբ` Արամ Աթեշյանի հանդեպ անվստահություն կա թե կղերական, թե պոլսահայ համայնքում, քանի որ տվյալ անձը դարձել է խնդրո առարկա, որը ոչ ոքի հաշվետու չէ:
«Երկու օր անընդմեջ եկեղեցական դասն Արամ Աթեշյանի հետ հանդիպել է, և այդ մարդը երկու ոտքը մեկ կոշիկի մեջ դնելով` չի ասել է, որ կհրաժարվի կամ տեղապահի թեկնածություն չի դնի, այսինքն` նա նույն դիրքորոշմամբ եկավ, նույն դիրքորոշմամբ էլ վերադարձավ` այս թուղթը ձեռքին»,- ընդգծեց վերլուծաբանը:
Վերջինիս կարծիքով` ստեղծված իրավիճակում Ամենայն հայոց կաթողիկոսը փոխարեն պատժեր կամ զսպեր Ա. Աթեշյանի սանձարձակ կեցվածքը, ավելի շատ Գարեգին և Սահակ եպիսկոպոսներին համոզելու, Ա. Աթեշյանի նկատմամբ ներողամիտ վերաբերմունք դրսևորելու դառն աշխատանք է կատարել:
Բանախոսի փոխանցմամբ` համաձայն Մայր Աթոռ Ս. Էջմիածնի տարածած գրության` մինչև մարտի 15-ը պոլսահայ համայնքը պետք է տեղապահ ունենան, որին ընտրում են կրոնական ժողովի 9 անդամներից ինչ-ինչ պատճառներով մնացած 6 անդամները և կեղարականներից բաղկացած հոգևոր համագումարը, ընդհանուր առմամբ` 25 հոգի:
Ս. Հացպանյանը նկատեց, որ տեղապահ ընտրելու իրավունք ունեցող վերնոշյալ 25 անձանցից շատերի վրա Ա. Աթեշյանը լուրջ ազդեցություն ունի իր լծակներով, որոնք նա կօգտագործի, և արդյունքում մեծանում է հավանականությունը, որ Ա. Աթեշյանը կդառնա տեղապահ:
«Սա նշանակում է, որ պոլսահայ համայնքը դարձյալ հայտնվեց կոտրված տաշտակի առաջ. Երեկվանից համայնքի ներկայացուցիչներն այս փաստաթղթին այնպիսի որակումներ են տվել, որ ես կամաչեմ բարձրաձայնել»,- ընդգծեց նա` մտավախություն հայտնելով, որ եթե Ա. Աթեշյանը տեղապահի թեկնածություն դնի, ապա պոլսահայ համայնքի ներսում պատերազմ կլինի և արյուն կթափվի:
ՀԱՅԵՐԵՆ
Русский
English
Դաս. հայերեն
French
