«Նոյյան Տապան» լրատվական գործակալության մամուլի սրահում այսօր հրավիրված ասուլիսում Հայաստանի պետական տնտեսագիտական համալսարանի տնտեսագիտության տեսության ամբիոնի դոցենտ, տնտեսագիտության թեկնածու, փորձագետ Ատոմ Մարգարյանը նշելով, որ քաղաքական շուկան ևս տնտեսական շուկաների կանոններով է աշխատում, ասաց.

«Կան այստեղ գնորդներ, դրանք կուսակցություններն են, դաշինքներն են, թեկնածուներն են, կան վաճառողներ, որքան էլ տարօրինակ է, մենք ենք` ընտրողներս, ապագա հարկատուներս: Գնորդները և վաճառողները, բնական է, այսպես ասած, սակարկում են այդ ապրանքների շուրջ, մենք վաճառում ենք մեր ապրանքները` մեր ձայները, դրա փոխարեն վերցնում ենք ծրագրեր, ուրիշ բան չհասկանաք… Մենք վերցնում ենք ծրագրեր, գաղափարներ, խոստումներ, և որտեղ կհավասարակշռվի շուկան, ցույց կտան, իհարկե, առաջիկա ընտրությունները»:

Տնտեսագետը միաժամանակ նշեց, որ ընտրողները տարասեռ են…

«Իհարկե, ողջամիտ, նորմալ ընտրողները,- շարունակեց Ատոմ Մարգարյանը,- առևտուր են անում, փոխանակության այս պրոցեսում ծրագրերի և խոստումների դիմաց են իրենց ձայները փոխանակում, բայց, ցավոք, մեր իրականությունն այնպիսին է, որ, այսպես կոչված, ռացիոնալ, անտարբեր ընտրազանգվածն առևտուր է անում, միջնորդավորված վաճառում է իր ձայնը փողով, չմտածելով ապագայի մասին: Նաև` պատճառներից մեկն է դա, թե ինչու է մեր երկիրը, մասնավորապես` տնտեսական համակարգը, կոռումպացված: Որովհետև քաղաքական կոռուպցիան, ըստ էության, ելակետ է հանդիսանում… Իսկ սա, ըստ էության, քաղաքական կոռուպցիա է, երբ որ մարդիկ զանգվածաբար վաճառում են իրենց ձայները փողով, ոչ` գաղափարների դիմաց, և ոչ` ծրագրերի դիմաց»:

 

 

Նոյյան տապան  -   Քաղաքական