ԵՐԵՎԱՆ, 26 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Հոկտեմբերի 26-ին տեղի ունեցավ «Աջակցություն Հայաստանի Մարդու իրավունքների պաշտպանի գրասենյակին» խորագրով Թվինինգ ծրագրի մեկնարկի պաշտոնական արարողությունը: 18-ամսյա ծրագիրն իրականացվելու է Հայաստանի Մարդու իրավունքների պաշտպանի եւ Ֆրանսիայի ու Իսպանիայի Օմբուդսմանների գրասենյակների միջեւ ձեռքբերված պայամանավորվածության համաձայն: Ինչպես հանդիսավոր արարողությանը նշեց Հայաստանի Մարդու իրավունքների պաշտպան Արմեն Հարությունյանը, ծրագրի շրջանակներում մշտապես Հայաստանում է գտնվելու Իսպանիայի եւ Ֆրանսիայի օմբուդսմանների գրասենյակների փորձագետներից կազմված խումբը, որն իր օգնությունն է ցույց տալու Հայաստանի մարդու իրավունքների պաշտպանի գրասենյակին: Այն հիմնականում ցուցաբերվելու է երեք ուղղություններով` ինստիտուցիոնալ, մարդկային ռեսուրսների ուսումնասիրություն եւ իրազեկության բարձրացում: Հայաստանում Եվրոպական հանձնաժողովի պատվիրակության ղեկավար Ռաուլ դե Լյուցենբերգերը նշեց, որ ծրագրի նպատակն է ուժեղացնել Հայաստանում Մարդու իրավունքների պաշտպանի ինստիտուտը, ինչը այդ ինստիտուտի եւ մարդու իրավունքների պաշտպանության բարձրացման կարեւորության եւս մեկ օրինակ է: Հայաստանում Ֆրանսիայի արտակարգ եւ լիազոր դեսպան Սերժ Սմեսոֆֆը գոհունակություն հայտնեց, որ Հայաստանում առաջին Թվինինգ ծրագիրն ուղղված է Մարդու իրավունքների պաշտպանի գրասենյակին: «Հայաստանը նմանատիպ ինստիտուտ ստեղծելով բավականին հավակնոտ եւ խիզախ ընտրություն է կատարել. բայց հաջողության գրավականը, այն գինը, որ պետք է վճարել, անշուշտ, այդ հաստատության անկախությունն է»,- ասաց դեսպանը:

---