Հայաստանը մտադիր է ակտիվորեն աջակացել Ռուսաստանին ահաբեկչության դեմ պայքարում. Սերժ Սարգսյան

24-03-2017 15:56:58 | Հայաստան | Հասարակություն

ՀՀ նախագահ Սերժ Սարգսյանը պատրաստակամություն է հայտնել Ռուսաստանի հետ ավելի ակտիվորեն պայքարել միջազգային ահաբեկչության, այդ թվում նաև «Իսլամական պետություն» ահաբեկչական խմբավորման դեմ: Այս մասին նա հայտարարել է «Միր» հեռուստաալիքին տված հարցազրույցում:

«Ես կարծում եմ, որ մենք կկարողանանք ավելի ակտիվորեն աջակցել Ռուսաստանի Զինված ուժերին այդ մեծ և կարևոր խնդրի լուծման հարցում: Ռուսաստանը մեծ ներդրում ունի այդ պայքարում, և մենք պետք է կրենք այդ պատասխանատվության և ջանքերի մի մասը»,- ասել է նա` հավելելով, որ Ռուսաստանի գործադրած ջանքերը պսակվում են հաջողությամբ:

Ս. Սարգսյանի խոսքերով` Հայաստանի կողմից հակաահաբեկչական գործունեության ակտիվացման հիմնական պատճառը տարածքային մոտիկությունն է ԻՊ գործողությունների գոտուն, որից Հայաստանը գտնվում է մոտավորապես 400 կ/մ հեռավորության վրա:

«Եթե հաշվի առնենք, որ ԻՊ գործողություններում ներգրավված են ԱՊՀ երկրների շատ քաղաքացիներ, ապա վաղ թե ուշ մեր տարածաշրջանում կհայտնվեն մարդիկ, որոնք արդեն կունենան ռազմական փորձ, կտիրապետեն բարբարոսական մեթոդների և լրացուցիչ դժվարություններ կառաջացնեն առանց այդ էլ փխրուն կայունության մեջ»,- ընդգծել է երկրի ղեկավարը:

Վերջինս նաև նշել է, որ հակամարտության շփման գոտու հակառակ հատվածում արդեն իսկ լսվում են արաբերեն լեզվով խոսակցություններ և այլ ձայներ:

ՀՀ նախագահը չի բացառել, որ Մերձավոր Արևելքից հեռացած այդ մարդիկ քիչ-քիչ կմոտենան հայկական սահմանին` ընդգրկվելով տարածաշրջանային հակամարտության մեջ:

Նոյյան տապան - Հասարակություն