Սամվել Բաբայան. «Առանց ղարաբաղյան հիմնահարցի լուծման
Թուրքիան սահմանը չի բացի»
09-10-2009 21:00:00 | Հայաստան | Քաղաքական
ԵՐԵՎԱՆ, 9 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: «ԼՂ-ի հարցում մենք չենք
կարող փոխզիջման գնալ` թեկուզ մեր գլխից ատոմային ռումբ կախեն»,-
նման համոզմունք հայտնեց հոկտեմբերի 9-ի ասուլիսում ԼՂՀ-ի
պաշտպանության բանակի նախկին հրամանատար Սամվել Բաբայանը: Ըստ նրա,
հայ-թուրքական նախաստորագրված արձանագրություններում Ղարաբաղի
հարցի մասին ոչ թե թաքնված, այլ պարզ ձեւով է ներկայացված:
Ս.Բաբայանի ունեցած տեղեկությունների համաձայն, առանց
ղարաբաղյան հիմնահարցի լուծման Թուրքիան սահմանը չի բացի: «Մենք
պետք է զգոն լինենք եւ ամբողջ ուշադրությամբ հետեւենք Ղարաբաղի
խնդրի խաղաղ կարգավորման բանակցություններին»,- ասաց նա`
հավելելով, որ ոչ ոք չի կարող Ղարաբաղի տարածքներից փոխզիջել.
կարող են այդ մասին խոսել, սակայն չեն կարող այն իրականացնել: «Ով
ուզում է լինի` Սերժ Սարգսյանը, թե ես, կամ մեկ ուրիշը, չի կարող
դա անել: Թույլ չեն տա նրանք, ովքեր պատերազմել են Ադրբեջանի դեմ
եւ ազգատարել այդ հողերը»,- նշեց Ս.Բաբայանը: Արցախի ժողովրդի
համար դա կյանքի եւ մահվան խնդիր է, եւ նրանք այլ բան չեն կարող
անել: «Նրանք պարզապես պետք է ճիշտ կազմակերպեն եւ պաշտպանեն այն
ինչ-որ ունեն: Պաշտպանեն նրանցից, ովքեր գնում են նման
փոխզիջումների` լինի դա հայ, թե թուրք` տարբերություն չկա»,-
հայտարարեց Ս.Բաբայանը:
Նրա կարծիքով, սփյուռքյան հանդիպումներից ՀՀ նախագահը պետք է
հետեւություններ անի եւ փորձի կամ փաստաթղթերում փոփոխություն
կատարել, կամ էլ վիժեցնել այդ գործընթացը: Հակառակ դեպքում,
Ս.Բաբայանի խոսքերով, «հայ ազգը կպառակտվի թե' ներսում, թե'
դրսում»:
Ս.Բաբայանի համոզմամբ, Հայաստանի կողմից արձանագրությունները
նախաստորագրվել են առանց արտաքին ուժերի ճնշման. Հայաստանը կամավոր
է գնացել այդ քայլին: Նա նշեց նաեւ, որ ՀՅԴ-ն այլընտրանք չունի եւ
պարտավոր է պայքարել այդ արձանագրությունների վավերացման դեմ:
«Բոլորս պետք է օգնենք Դաշնակցությանը հաջողության հասնելու
համար»,- ասաց նա, հավելելով, որ պատրաստ է անգամ պահանջել ՀՀ
նախագահի հրաժարականը: