Հայտնի ջազ դաշնակահար Տիգրան Համասյանը երկու մենահամերգով հայ հանդիսատեսին կներկայացնի իր նոր ալբոմը (տեսանյութ)

05-05-2017 15:18:08 | Հայաստան | Հասարակություն

Հայազգի հայտնի ջազ դաշնակահար, բազմաթիվ մրցույթների հաղթող Տիգրան Համասյանի նոր սոլո ալբոմի` "An ancient observer" (թարգմանաբար` «Հնագույն դիտորդը») շնորհանդես-համերգաշարը հասել է Երևան: Մայիսի 7-ին և 8-ին Արամ Խաչատրյանի անվան Օպերայի և բալետի ազգային ակադեմիական թատրոնում ջազ երաժիշտը հանիսատեսի կներկայացնի վերջին չորս տարիների իր նոր ստեղծագործությունները, բացառությամբ երկուսի, որոնք հիմնված են հայկական մեղեդիների վրա:

Ինչպես մայիսի 5-ին լրագրողների հետ հանդիպման ժամանակ տեղեկացրեց Տ. Համասյանը, վերոնշյալ ալբոմը լույս է տեսել մարտի 31-ին, իսկ համերգաշարը շարունակվելու է մինչև 2018 թվականի ավարտը:

«Սոլո ֆորմատով այս ալբոմի շրջանակներում 27 համերգներ արդեն եղել են, իսկ Երևանից հետո համերգներ կլինեն Ժնևում, Մոսկվայում, Ճապոնիայում, Ավստրալիայում ու մի շարք այլ Եվրոպական երկրներում»,- ասաց նա:

Տ. Համասյանի փոխանցմամբ` առաջիկայում նախատեսում է ժողովրդական շատ պարզ մեղեդիների վրա հիմնված բարդ և ռիթմիկ էտյուդների շարք մշակել:

Կարևորելով մշակութային փորձի փոխանակությունը` ջազ դաշնակահարը նկատեց, որ Հայաստանում որոշ երաժշտական ուղղություններում, մասնավորապես, ջազի ասպարեզում չկա մրցակցություն, ինչը պայմանավորված է նրանով, որ երաժիշտները և քիչ են, և դուրս չեն գալիս Հայաստանի սահմաններից:

Նրա խոսքերով` հասարակության շրջանում առաջարկը կծնի պահանջարկ միայն այն դեպքում, երբ մրցակցություն կլինի տեղի երաժիշտների միջև: Լրագրողի այն հարցին, թե ինչպե՞ս է ստացվում, որ Տ. Համասյանի երաժշտությունը մշտապես դրական արձագանքների է արժանանում ինչպես Հայաստանում, այնպես էլ արտերկրում, արվեստագետն ընդգծեց, որ արտասահմանում հայկական երաժշտական մեղեդիները հանդիսատեսի կողմից ընկալվում են որպես էկզոտիկա, իսկ այստեղ գեղագիտական հաճույք են ստանում` երբեմն չհասկանալով, թե ինչ է կատարվել ազգային երաժշտության հետ:

Էլիզա Զախարյան, «Նոյյան Տապան»

Նոյյան տապան - Հասարակություն

Կարդացել են 1240 անգամ

Հայտնի ջազ դաշնակահար Տիգրան Համասյանը երկու մենահամերգով հայ հանդիսատեսին կներկայացնի իր նոր ալբոմը (տեսանյութ)

Noyan Tapan TV