Մանդատների թիվը կորոշվի 1 շաբաթ անց.Տիգրան Մուկուչյան
15-05-2017 13:17:59 | Հայաստան | Քաղաքական
Տեղեկացրել էինք, որ ԿԸՀ-ն ամփոփել է ընտրությունների արդյունքները, որոնք կհաստատվեն 1 շաբաթ հետո: Լրագրողների հետ զրույցում ԿԸՀ նախագահ Տիգրան Մուկուչյանը նշեց, որ հաշվարկ դեռ չի կատարվել, թե որ կուսակցությունը քանի մանդատ կստանա, քանի որ մինչև ընտրությունների վերջնական ամփոփումը կա մեկ շաբաթ, որը նախատեսված է դիմում-բողոքներ ներկայացնելու, գրանցամատյաններում արձանագրված խախտումներն ուսումնասիրելու և համապատասխան որոշումներ կայացնելու համար: «Երբ վերջնական արդյունքների արձանագրությունը կազմվի, ավագանու 65 մանդատը կբաժանվի կուսակցությունների միջև` ստացած ձայների համեմատ»,- ասաց նա:
Ինչ վերաբերում է բողոք-դիմումներին, ապա, ԿԸՀ նախագահի տեղեկացմամբ, 3 օրվա ընթացքում գրավոր ոչ մի բողոք-դիմում չի ստացվել: «Այս պահի դրությամբ էլ վերահաշվարկի կամ որևէ այլ բողոք-դիմում չի ստացվել, բայց դիմումներ կարող են ներկայացվել այսօր, ժամը 12-ից սկսած մինչև 18:00-ն, տարածքային ընտրական հանձնաժողովներ և վաղն առավոտյան` 9-ից մինչև 11:00-ն: Այլ անձի փոխարեն քվեարկելու համար դիմումներ ներկայացնելու ժամկետը մեկ օր ավելի շատ է: Դիմումների ընդունման ժամանակահատվածը պայմանավորված է նրանով, որ արդյունքների ամփոփման համար նույնպես գոյություն ունի հատուկ ժամկետ` 7 օր, այսինքն` որպեսզի հանձնաժողովները բավարար ժամկետ ունենան դրանք ուսումնասիրելու համար»,- հայտնեց Մուկուչյանը:
Ըստ նրա` երեկ` օրվա ընթացքում, ԿԸՀ-ն ստացել է տարբեր բնույթի ահազանգեր` խորհրդատվություն ստանալուց մինչև տարբեր տեսակի խախտումների վերաբերյալ բողոքներ: Մուկուչյանի գնահատմամբ` այս ընտրությունների ժամանակ աննախադեպ քիչ էր ահազանգերի թիվը, որոնցով արդեն իսկ զբաղվում է թե՛ ոստիկանությունը, թե՛ դատախազությունը:
ՀԱՅԵՐԵՆ
Русский
English
Դաս. հայերեն
French
