ԱՆՏՎԵՐՊԵՆ, 16 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ:
Բելգիայի Անտվերպեն քաղաքի «Նուարդ» հայկական մշակութային
միությունը դեկտեմբերի 12-ին կազմակերպել էր գրական-երաժշտական
երեկո` նվիրված Կոմիտասի ծննդյան 140-ամյակին:
Երեկոն բացել եւ Կոմիտասի կյանքի ու գործունեության մասին
խոսել է միության նախագահ, «Լրագիր» ամսաթերթի գլխավոր խմբագիր,
Բելգիայի հայկական կազմակերպությունների նորաստեղծ ֆեդերացիայի
նախագահ Գեւորգ Մինասյանը:
Երեկոյի ընթացքում հնչել են Կոմիտասի երգերը իր եւ Արմենակ
Շահմուրադյանի կատարմամբ, իր հրաշալի ձայնով ներկաներին հիացրել է
Լենա Բեգլարյանը: Կոմիտասի մշակած երկերը կատարել է «Նուարդ»
միության շաբաթօրյա դպրոցի մանկական երգչախումբը /ղեկավար` Լենա
Բեգլարյան/, ասմունքել է նույն դպրոցի ասմունքի խումբը` դպրոցի
ուսուցչուհի Լիլիթ Գինոսյանի ղեկավարությամբ: Երեկոյի ընթացքում
բեմադրվել է ասմունքող Անյա Նալբանդյանի եւ Նարինե Շահվերդյանի
պատրաստած թատերական փոքրիկ ներկայացումը: Հանդես է եկել նաեւ
ջութակահար Արա Հակոբյանը:
Երեկոյին իր մասնակցությունն է բերել բելգիահայոց հոգեւոր
հովիվ տեր Զատիկ վարդապետ Ավետիքյանը: