Ստորագրվել է փոխըմբռնման հուշագիր՝ ԱՄՆ խաղաղության կորպուսի հետ
20-06-2017 19:10:55 | Հայաստան | Սպորտ
Այսօր ՀՀ սպորտի և երիտասարդության հարցերի նախարարության և ԱՄՆ խաղաղության կորպուսի միջև փոխըմբռնման հուշագիր է ստորագրվել:
Այն ստորագրել են ՀՀ սպորտի և երիտասարդության հարցերի փոխնախարար Արսեն Քարամյանը և ԱՄՆ խաղաղության կորպուսի ծրագրերի և դասընթացների տնօրեն Ջինա Գրոթլուշնը:
«Հուշագրի ստորագրումն առկա հարաբերությունների վավերացում է և նպատակ ունի կյանքի կոչել այն համատեղ ծրագրերը, որոնք կնպաստեն ԱՄՆ խաղաղության կորպուսի կողմից առաջ քաշված խնդիրների լուծմանը, որոնք հետաքրքիր են նաև մեզ համար»,- նշել է Արսեն Քարամյանը:
Ըստ նրա՝ Հայաստանում ԱՄՆ խաղաղության կորպուսը լուրջ առաքելություն է իրականացնում, ու Սպորտի և երիտասարդության հարցերի նախարարությունը՝ որպես երիտասարդության հետ աշխատող պետական լիազոր մարմին, հետաքրքրված է նրանց հայաստանյան գործունեությամբ և փոխլրացման ծրագրերով:
Ջինա Գրոթլուշնը նույնպես կարեւորել է հուշագրի ստորագրումը, որը համահունչ է նախարարության քաղաքականությանը. «Մեզ համար կարևոր է հուշագիր ունենալ ՀՀ սպորտի և երիտասարդության հարցերի նախարարության հետ, քանի որ դրանով մեր գործունեությունը համաձայնեցվում է նախարարության քաղաքականությանը: Մեզ համար կարևոր է, որ այն ծրագրերը, որոնք իրականացնում ենք Հայաստանի երիտասարդների շրջանում, համահունչ լինեն նախարարության խնդիրներին և նպատակներին»:
Հավելենք, որ ԱՄՆ խաղաղության կորպուսի և ՀՀ սպորտի և երիտասարդության հարցերի նախարարության միջեւ արդեն համագործակցության 4-րդ հուշագիրն է ստորագրվում:
ՀԱՅԵՐԵՆ
Русский
English
Դաս. հայերեն
French
