«ԵՍ ԵՄ ԶԻՆՎՈՐԸ» բարեգործական ծրագրի 2-րդ փուլի ընթացքում նվերներ կփոխանցվեն Մարտակերտի, Ասկերանի և «Եղնիկներ» զորամասերի զինվորներին (տեսանյութ)
23-10-2017 16:38:47 | Արցախ (ԼՂՀ) | Բարեգործություն
Նոյեմբերի երկրորդ կեսից մեկնարկելու է «ԵՍ ԵՄ ԶԻՆՎՈՐԸ» բարեգործական ծրագրի երկրորդ փուլը, որի շրջանակներում Ասկերանի, Մարտակերտի զորամասեր և «Եղնիկներ» կհասցվեն զիվորների համար առաջին անհրաժեշտության պարագաններ և խրախուսական պատվոգրեր:
Ինչպես հոկտեմբերի 23-ին լրագրողների հետ հանդիպման ժամանակ տեղեկացրեց բարեգործական ծրագրի նախաձեռնող, «ԱՅ ԲԻ ՍԻ» ռազմահայրենասիրական հասարակական կազմակերպության նախագահ Արմենուհի Թունյանը, «ԵՍ ԵՄ ԶԻՆՎՈՐԸ» բարեգործական ծրագրի նպատակն է նյութական և բարոյահոգեբանական աջակցություն ցուցաբերել հայ զինվորին:
Ըստ նրա՝ ծրագրի առաջին փուլն իրականացվել է սեպտեմբերի 5-ին, երբ տոնվել է Մատաղիսի 22-ամյակը:
«Քանի որ հանրությանը խոստացել էինք լինել զինվորի կողքին, ուստի սպտեմբերին մեկնարկեցինք մեր ծրագրի առաջին փուլը, որի ընթացքում առաջին անհրաժեշտության պարագաններ ու խրախուսական պատվոգրեր նվիրեցինք Մատաղիսի, Հադրութի, Ջաբրաիլի, Արալեռի զորամասերի զիվորներին»,- նշեց Ա. Թունյանը՝ հավելելով, որ իրենց համար ամենակարևորը հայ զինվորի դեմքին ժպիտ տեսնելն է:
Նրա խոսքերով՝ զինվորների համար նվերներ գնելու նպատակով հաճախ են դրամահավքներ կազմակերպում Հայաստանի տարբեր քաղաքներում ու մարզերում:
Բանախոսը նաև տեղեկացրեց, որ տարբեր միջոցներով աջակցում են նաև զոհված կամ վիրավոր ազատամարտիկների անապահով ընտանիքների անդամներին: Մասնավորապես, «ԱՅ ԲԻ ՍԻ» ռազմահայրենասիրական ՀԿ-ին այդ հարցում օգնում է «Արմինո» հագուստի և կոշիկների խանութներից ցանցը:
«ԱՅ ԲԻ ՍԻ» Ռազմահայրենասիրական հասարակական կազմակերպության փոխնախագահ Ռոլան Ազիզյանն իր հերթին նշեց, որ վերոնշյալ ծրագրի իրականացման գործում մեծ է այն բոլոր նվիրատուների դերը, ովքեր կամ գումար են փոխանցում, կամ հագուստ:
ՀԱՅԵՐԵՆ
Русский
English
Դաս. հայերեն
French
