ԵՐԵՎԱՆ, 12 ՕԳՈՍՏՈՍԻ, ՆՈՅՅԱՆ ՏԱՊԱՆ: Օգոստոսի 28-ին Սեւանում կմեկնարկի «Երաժիշտները հանուն խաղաղության» միջազգային երաժշտական առաջին փառատոնը, որին կմասնակցեն ռոք եւ բլյուզ ժանրերում ստեղծագործող երգիչներ եւ խմբեր Հայաստանից, Վրաստանից եւ Անգլիայից` այդ թվում «Ռե մինոր», «Ռեինկարնացիա», «Դորիանս», «Բամբիռ», «Սթրինգ», «Բաքուր», «Սմայլ», «Վովա Մագիլաձե», «Ամրիտա» խմբերը: Փառատոնի կազմակերպիչը «Ֆորշ ընդ ֆրենդս» ընկերությունն է, իսկ հովանավորներն ու աջակիցները ՀՀ Էկոնոմիկայի, Տրանսպորտի եւ կապի, Մշակույթի եւ Սփյուռքի նախարարությունները: Ինչպես օգոստոսի 12-ի ասուլիսում հայտնեց Էկոնոմիկայի նախարարության Զբոսաշրջության եւ տարածքային տնտեսական զարգացման վարչության պետ Մեխակ Ապրեսյանը, նմանատիպ միջոցառումների օգնությամբ է պետք խթանել զբոսաշրջության զարգացումը Հայաստանում: Նա հույս հայտնեց, որ փառատոնը կդառնա ավանդական: Երգիչ Ֆորշը նշեց, որ փառատոնի նպատակն է ակտիվացնել հայ երաժիշտների համագործակցությունը միջազգային երաժշտական կազմակերպությունների եւ խմբերի հետ, Հայաստանը միջազգային հանրությանն ու համաշխարհային զբոսաշրջային շուկային ժամանակակից ժամանցային ռեսուրսներով եւ հարուստ մշակութային ավանդույթներով ներկայացնելը:

---