Վաղը կայանալիք Կիոկուշին կարատեի Եվրոպայի առաջնությունը նվիրված է Երևանի հիմնադրման 2800-ամյակին (տեսանյութ)
06-04-2018 23:08:40 | Հայաստան | Հասարակություն
Աշխարհի 28 պետությունների ազգային հավաքականները ներկայացնող ավելի քան 700 առաջատար մարզիկներ արդեն իսկ ժամանել են մայրաքաղաք Երևան, մասնակցելու ապրիլի 7-ին և 8-ին կայանալիք Կիոկուշին կարատեի Եվրոպայի առաջնությանը:
Ինչպես առաջնությունից առաջ «Արարատ» հյուրանոցում լրագրողների հետ կայացած հանդիպման ընթացքում նշեց Հայաստանի Կիոկուշին կարատեի ֆեդերացիայի նախագահ Անդրանիկ Հակոբյանը, մրցաշարն անցկացվելու է երեխաների, պատանիների և մեծահասակների միջև:
«Եվրոպայի առաջնությունը նվիրված է Երևանի հիմնադրման 2800-ամյակին: Մեզ աջակցել են ՀՀ սպորտի և երիտասարդության հարցերով նախարարությունը, Երևանի քաղաքապետարանը և Ազգային օլիմպիական կոմիտեն»,- նշեց նա:
Ա. Հակոբյանի փոխանցմամբ՝ Հայաստանում Կիոկուշին կարատեի եվրոպայի առաջնությունը բարձր մակարդակով անցկացնելու համար արտասահմանից հատուկ մասնագետներ են հրավիրվել, որոնք 360 աստիճան տեսախցիկների օգնությամբ օնլայն հեռարձակում են ապահովելու աշխարհի բոլոր մարզասերների համար:
Նրա խոսքերով՝ «Միկա» մարզահամալիրում տեղադրվելու են հեռուսատցույցներ, որոնցից յուրաքանչյուրը կցուցադրի ամեն մի երկրի մարզիկին մրցելույթին պատրաստվելիս և դրանից հետո, ինչը հնարավորություն կտա հանդիսատեսին ավելի հեշտ ընկալել մրցաշարի ընթացքը:
Կիոկուշին կարատեի Եվրոպայի առաջնությանը մասնակցելու են նաև միջազգային որակավորում ունեցող 50 մրցավարներ, ովքեր ապահովելու են մրցաշարի օբյեկտիվությունը:
Ռուսաստանի դաշնության կիոկուշին կարատեի ֆեդերացիայի նախագահ Ալեքսանդր Տանյուշկինի կարծիքով՝ Հայաստանը շատ լավ պատրաստված մարզիկներ ունի, որոնց հետ արժե մրցել նմանատիպ առաջնությունների շրջանակներում:
«Շատ ուրախ եմ, որ Հայաստանը միացել է մեր միջազգային կազմակերպությանը: Կարծում եմ՝ առաջնությունը շատ հետաքրքիր կանցնի, քանի որ այստեղ են ժամանել ուժեղ մարզիկներ, որոնց մրցելույթներին հետևելը հաճելի կլինի»,- ընդգծեց նա:
Նշենք, որ Ադրբեջանը հրաժարվել է մասնակցել Կիոկուշին կարատեի Եվրոպայի առաջնությանը, ավելին՝ նույնը հորդորել է Թուրքիային: Ի տարբերություն այս երկրների ազգային հավաքականների՝ Թուրքիայից իր մասնակցությունը հաստատել է մեկ թիմը, որն այսօր ժամանելու է Երևան:
ՀԱՅԵՐԵՆ
Русский
English
Դաս. հայերեն
French
