Փողային գործիքների 2-րդ միջազգային փառատոնը կհյուրընկալի յոթ երկրներից ավելի քան քսան երաժիշտ կատարողների
31-05-2018 11:51:31 | Հայաստան | Մշակույթ
, Սույն թվականի հունիսի 12-ից- 15-ը Երևանի մի շարք համերգասրահներում, ինչպես նաև Բյուրականի արվեստի ակադեմիայում տեղի կունենա Ալեքսանդր Հարությունյանի անվան փողային գործիքների 2-րդ միջազգային փառատոնը։ Հպարտորեն պետք է նշենք, որ աշխարհի մակարդակով Հայաստանը երկրորդ երկիրն է, որտեղ անցկացվում է բացառապես փողային գործիքների միջազգային փառատոն: Այս տարի Հայաստանում հյուրընկալվելու են յոթ երկրներից ավելի քան քսան երաժիշտ կատարողներ: Իրենց մասնակցությամբ փառատոնը պատվելու են այնպիսի երաժիշտներ, ովքեր աշխատում և ստեղծագործում են Վիեննայի ֆիլհարմոնիկ, Սանկտ Պետերբուրգի Մարինյան թատրոնի ինչպես նաև այլ հեղինակավոր նվագախմբերում:
Տեղեկացնենք, որ փառատոնի գեղարվեստական ղեկավար և դիրիժորը Կարեն Դուրգարյանն է:
Այս տարի փառատոնն իրականացվում է Հայաստանի պետական կամերային նվագախմբի և նվագախմբի գեղարվեստական ղեկավար ու գլխավոր դիրիժոր Վահան Մարտիրոսյանի հետ համատեղ: Իսկ փառատոնի տնօրեն եւ պրոդյուսերն է Շմավոն Գրիգորյանը։