Հայազգի դերասանուհու կողմից Նյու Յորքում հիմնադրված SR Socially Relevant կինոփառատոնին ներկայացվում են սոցիալական խնդիրների մասին ֆիլմեր (ՏԵՍԱՆՅՈՒԹ)
07-06-2018 15:58:59 | Հայաստան | Հասարակություն
Նյու Յորքում ամեն տարի անցկացվող SR Socially Relevant կինոփառատոնում ներկայացվում են բացառապես սոցիալական խնդիրներին անդրադարձող ֆիլմեր:
Այս մասին լրագրողների հետ հանդիպման ժամանակ տեղեկացրեց փառատոնի հիմնադիր, գեղարվեստական ղեկավար, սոցիոլոգ, հայազգի դերսանուհի Նորա Արմանին:
Ըստ նրա՝ նման կինոփառատոն ստեղծելու և ամեն տարի անցկացնելու գաղափարն առաջացել է իր այն մտահոգությունից, որ կինոարվեստում հակավայրագություն է տիրում:
Ն. Արմանիի խոսքերով՝ հատկապես ամերիկյան ֆիլմերում այսօր հնարավոր չէ տեսնել մի պաստառ կամ ծանուցում, որի վրա զենք պատկերված չլինի:
«Փառատոնը մերժում է բռնության տարածումը, հետևաբար ֆիլմերում բռնությունների պատկերային նկարագությունը ևս մերժվում է հանձնաժողովի կողմից: SR Socially Relevant-ը շահույթ չհետապնդող կինոփառատոն է, որի նպատակն է օգնել այն կինոռեժիսորներին, ովքեր իրենց ֆիլմերում բարձրացնում են սոցիալական հարցերի իրազեկությունը»,- ընդգծեց կինոփառատոնի հիմնադիրը:
Վերջինիս փոխանցմամբ՝ կինոփառատոնի գոյության հինգ տարիների ընթացքում ցուցադրվել է 277 ֆիլմ աշխարհի 35 երկրներից: Ֆիլմերը ներառել են ներգաղթի, կանանց և աղջիկների, մարդկանց թրաֆիկինգի, կլիմայի փոփոխության, ծերացման, հոգեկան առողջության, հաշմանդամության, սոցիալական արդարության, անօթևանության կանանց իրավունքների թեմաները:
«Կինոփառատոնն ամենամյա է և անցկացվում է մարտի 15-25-ն ընկած ժամանակահատվածում: Ինքս հայ լինելով և ցանկանալով, որպեսզի հայ կինոռեժիսորներն էլ մասնակցեն այս միջազգային փառատոնին, անպայման ապահովում ենք վերջիններիս ներկայությունը: Այս տարի ունեցանք երկու կարևոր ֆիլմ. Առաջին ֆիլմի հերոսները հայերն էին Լիբանանում, Սիրիայում և Թուրքիայում, իսկ երկրորդ խաղարկային ֆիլմը պատմում էր Խորհրդային միության փլուզումից հետո անկախության ձեռք բերման անցումային շրջանի դժվարին տարիների մասին»,- փաստեց Ն. Արմանին:
Նրա փոխանցմամբ՝ երկրորդ ֆիլմը, որի ռեժիսորը Դավիթ Սաֆարյանն է, այս տարի արժանացել է առաջին մրցանակի:
Նշենք, որ SR Socially Relevant-2019-ը կանցկացվի մարտի 15-21-ին Նյու Յորքի «Cinema Village» կինոթատրոնում:
Նորա Արմանին London School of Economics-ի շրջանավարտ է, ով ավարտել է որպես սոցիոլոգ՝ արդյունաբերական ընկերությունների ռասսայական և էթնիկ փոխհարաբերությունների և սոցոլոգիական ուսումնասիրության մեթոդների մագիստրոսի կոչումով / M. Sc. Sociology ECON- University of London LSE/:
Վերջին երեք տարին աշխատել է որպես հաղորդակցության տնօրեն Director of Communications and Special Projects Manager/ Նյու Յորքում և Լոս Անջելոսում տեղակայաված շահույթ չհետապնդող The Arc/k Project կազմակերպության, որը նվիրված է ֆոտոգրամետրիի միջոցով 3D / եռաչափ/ պատկերներով համաշխարհային մշակութային ժառանգության թվային պահպանությանը:
ՀԱՅԵՐԵՆ
Русский
English
Դաս. հայերեն
French
