ՀՀ ազգային անվտանգության ծառայության տնօրենին ու ծառայությանը կոչ ենք անում զբաղվել գիտնականի հնչեցրած փաստերի քննությամբ (տեսանյութ)
07-06-2018 21:35:09 | Հայաստան | Իրավունք
Սևանա լճում կառուցված բոլոր փոքր ՀԷԿ-երը, ստացվում է, որ օրենքը շրջանցել են: Այսօր այս մասին «Նոյյան Տապան» լրատվական կենտրոնի ուղիղ եթերում հայտարարեց ՀՀ ԳԱԱ Կենդանաբանության և հիդրոէկոլոգիայի գիտական կենտրոնի տնօրեն, կենսաբանական գիտությունների դոկտոր, պրոֆեսոր Բարդուխ Գաբրիելյանը (տեսանյութը` 7.02-ից): Իսկ ո՞ր օրենքը…
«Կա օրենք «Կենդանական աշխարհի մասին», որտեղ հստակ գրված է, որ այն տեղերը, որոնք հանդիսանում են բազմացման վայր էնդեմիկ կամ վտանգված («Կարմիր գրքում» գտնվող) կենդանիների, այնտեղ արգելված է որևէ գործունեություն,- ասաց Բարդուխ Գաբրիելյանը:- Մեր հիմնական գետերը Սևանա լճում ինն են, որոնք հանդիսանում են հիմնական ձվադրավայր մեր էնդեմիկ ձկնատեսակների` Սևանի իշխանի, Սևանի բեղլուի և Սևանի կողակի համար: Փաստորեն այդ բոլոր գետերում պետք է արգելված լիներ, բայց համարյա բոլորի վրա հիմա կան փոքր ՀԷԿ-եր, ինչն արդեն հակասում է Հայաստանի օրենսդրությանը կենդանական աշխարհի մասին: Այն, որ փաստորեն Սևանա լճի ավազանի բոլոր գետերն այն պայմանները չունեն, որ մեր էնդեմիկ ձկնատեսակները կարողանան բազմանալ, փաստ է»:
Գիտնականի հավաստմամբ, տացվում է, որ պետությունը Սևանա լճի համար բավական մեծ գումարներ է ծախսում, բաց է թողնում իշխանի մանրաձկները, այնտեղ նրանք զարգանում, մեծանում են և երբ որ պետք է գնան բազմանալու այդ գետերում, դրա հնարավորությունը չունեն:
«Եվ խոսել այն մասին, որ մենք ունենք ձկան վերականգնված պոպուլյացիա Սևանա լճում, չենք կարող, քանի որ մինչև չլինի բնական վերարտադրություն, խոսել վերականգնման մասին չի կարելի, ինչքան էլ լցնեն,- ասաց Բարդուխ Գաբրիելյանը:- Վերջապես, պետությունը չի կարող ամեն տարի գումար ծախսի, լցնի այդ մանրաձուկը, այս կողմից լցնի, այն կողմից որսագողերն օգտվեն, որսան»:
Կարող ենք հավաստել, որ ՀՀ ԳԱԱ Կենդանաբանության և հիդրոէկոլոգիայի գիտական կենտրոնի ղեկավարի վերոնշյալ ահազանգը միանգամայն համապատասխանում է իրականությանը: Հետևաբար ՀՀ ազգային անվտանգության ծառայության տնօրենին ու ծառայությանը կոչ ենք անում զբաղվել գիտնականի հնչեցրած փաստերի քննությամբ, գնալ դրանց հետքերով, այդ փաստերին տալ համապատասխան ընթացք` պարզել, թե ինչպես, ո՞ւմ հանցավոր գործունեության կամ անգործության արդյունքում է հնարավոր դարձել «Կենդանական աշխարհի մասին» ՀՀ օրենքի հիշյալ պահանջի ոտնահարմամբ Սևանա լիճ լցվող գետերի վրա բազմաթիվ փոքր ՀԷԿ-երի կառուցումը:
Անհրաժեշտ է պարզել նաև Սևանա լճում տեղական իշխանի պաշարների վերականգնման հայտարարված նպատակով պետական բյուջեից ահռելի միջոցների մսխումը հօգուտ ձկնագողերի, Սևանի իշխանի պաշարների վերականգնման ծրագրի գրեթե զրո արդյունավետություն ունենալու բոլոր պատճառները և այս ամենում առկա կոռուպցիան: