Համատիրությունների ինստիտուտը չի կարելի լուծարել (ՏԵՍԱՆՅՈՒԹ)
12-06-2018 15:49:47 | Հայաստան | Հասարակություն
Համատիրությունների ինստիտուտը չի կարելի լուծարել. Այն շատ ավելի լավն է, քան քաղաքապետարանի կամ համայնքապետարանի ինստիտուտը:
Այս մասին հունիսի 12-ին լրագրողների հետ հանդիպման ժամանակ նշեց «Զարթոնք» գաղափարական-քաղաքական ակումբի անդամ, «Հասարակական պաշտպանների միության» տնօրեն Արամ Գրիգորյանը:
Ըստ նրա՝ համապատասխան օրենքի նախագիծը կազմվել է նախորդ իշխանությունների կողմից , ինչը նշանակում է, որ նախագծում դրված է նախորդ իշխանության կառավարման տրամաբանություն այն դեպքում, երբ հասարակությունը թավշյա հեղափոխության միջոցով մերժեց այդ համակարգը:
«Ինձ համար անհասկանալի է, թե նոր իշխանությունները նոր տրամաբանության մեջ ինչու են նախորդ իշխանությունների տրամաբանությամբ գրված օրենքի նախագիծը դրել շրջանառության մեջ»,- նկատեց Ա. Գրիգորյանը:
Վերջինիս խոսքերով՝ բազմաբնակարան շենքերի կառավարման համակարգում և համատիրություններում կան բազմաթիվ խնդիրներ, սակայն փաստ է, որ վերոնշյալ օրենքի նախագիծն այդ խնդիրները չի լուծում:
Բանախոսի փոխանցմամբ՝ կամ նշյալ նախագիծը կազմվել է մարդկանց խմբի կողմից, որոնք առկա խնդիրները լավ չեն պատկերացնում, կամ նախագծի հեղինակները խմբակային շահ են հետապնդել:
«Օրենքի նախագծում նշված է, որ պետք է արհեստավարժ կառավարիչների ինստիտուտ ստեղծվի, որոնք կլինեն իրավաբանական անձիք, կամ անահատ ձեռնարկատեր, այսինքն՝ արդեն ֆունկցիաներ են դրել դրա մեջ: Նպատակը ժամանակի տրամաբանության մեջ հետևյալն է եղել, քանի որ շենքերը չեն ինքնակազմակերպվելու և չեն ստեղծելու իրենց կառավարաման մարմինը, ինչու, որովհետև չկա դրա պահանջը, ապա այդ լիազորությունը վերապահել քաղաքապետերին ու համայնքապետերին: Ինչու է այդպես արվել, որովհետև քաղաքապետերի և համայնքապետերի կողմից նշանակված կառավարիչներին հեշտ է հրահանգներ տալը հատապես ընտրությունների նախաշեմին»,- ընդգծեց Ա. Գրիգորյանը:
Իր հերթին «Զարթոնք» գաղափարական-քաղաքական ակումբի անդամ, տնտեսագետ Լևոն Թումանյանը նշեց, որ այսօր համատիրությունները լավ չեն աշխատում, սակայն ինստիտուտը զարգացնելու և արդյունավետ դարձնելու փոխարեն փորձում են ինչ-որ բաներ հնարել:
Նրա դիտարկմամբ՝ Հայաստանում ընտրություններն այնքան են վարկաբեկվել, որ շատ մեծ անվստահություն է առաջացել ընտրությունների նկատմամբ, այդ թվում նաև համատիրությունների:
Բանախոսներն առաջարկում են նոր կառավարության և Արդարադատության նախարարության ներկայացուցիչներին փորձագետների հետ քննարկումներ կազմակերպել, որոնց ընթացքում վերջիններս հնարավորություն կստանան հիմնավոր կերպով ներկայացնել նախորդ իշխանությունների կազմած օրենքի նախագծի թերությունները, նաև առաջարկել նոր լուծումներ:
ՀԱՅԵՐԵՆ
Русский
English
Դաս. հայերեն
French
