Երեւանում Հոկտեմբերի 1-8-ը կանցկացվի «ՀԱՅ ՖԵՍՏ» (HIGH FEST) ութերորդ Միջազգային Թատերական փառատոնը, որին կմասնակցեն 22 երկրներից ժամանած 250 մասնակից, որոնք 15 բեմահարթակներում 8 օր անընդմեջ կներկայացնեն շուրջ 60 ներկայացում: Փառատոնին մասնակցում են համաշխարհային համբավ վայելող Իմիթեյդինգ դը Դոգ թատրոնը (Միացյալ Թագավորություն), Լուդեմ թատրոնը (Չեխիա), եւ Չառլզտաուն ՈՒորքինգ թատրոնը (ԱՄՆ): «ՀԱՅ ՖԵՍՏ»-ի շրջանակներում կանցկացվի իրանական ներկայացումների հատուկ ծրագիր (show-case): Փառատոնը կբացի իրանական Էմրուզ թատրոնի «Ավաժիկ` արտադրված է Իրանում» տրագիկոմեդիան: Ինչպես նշեց փառատոնի տնօրեն Արթուր Ղուկասյանը, « Փառատոնի շրջանակներում Երեւանում առաջին անգամ կանցկացվի IFEA (Միջազգային Փառատոնների եւ Իրադարձությունների Ասոցացիա ) խորհրդի տարեկան նիստը, որին կմասնակցեն Պեկինի թատերական ակադեմիայի ռեկտոր Շեն Լինը, պրոդյուսեր Ռոջեր Մակքենը Լոնդոնից:Նա նշեց նաեւ, որ մասնակից միջազգային փորձագետները Երեւանում կանցկացնեն սեմինարներ եւ վարպետության դասեր: «ՀԱՅ ՖԵՍՏ» փառատոնն անց է կացվում ՀՀ Մշակույթի նախարարության աջակցությամբ: Փառատոնի շրջանակներում թատերասերները հնարավորություն կունենան դիտել դրամատիկական, երաժշտական, պարային ներկայացումներ, ինչպես նաեւ բացօթյա ներկայացումներ:

---