Գավառում պատրաստվում ենք շահագործման հանձնել թատրոնի մեծ շենք. Իշխան Սաղաթելյան (ՏԵՍԱՆՅՈՒԹ)

23-07-2018 14:28:24 | Հայաստան | Հասարակություն

Հանրապետության ամենամեծ մարզում՝ Գեղարքունիում խնդիրները բազմաթիվ են՝ սոցիալականից մինչև մշակութային: Այս պահին գնահատվում է խնդիրների հրատապությունը:

Ինչպես «Նոյյան Տապան»-ի հետ զրույցում տեղեկացրեց Գեղարքունիքի նորանշանակ մարզպետ Իշխան Սաղաթելյանը, 1,5 ամսվա ընթացքում գույքագրում են իրականացրել և փորձել լուծում տալ հրատապ խնդիրներին:

Նրա խոսքերով՝ մարզում խնդիրներ կան դպրոցաշինության, ոռոգման և խմելու ջրի, համայնքների ճանապարհների, կոյուղիների, աղբահանության հետ կապված:

«Հիմա փորձում ենք հասկանալ, որոնք են հրատապ, որոնք են առաջնային: Մի շարք սուբվենցիոն ծրագրեր ենք սկսել, որոնք ֆինանսավորում են և կառավարությունը, և համայնքները»,- նշեց Ի. Սաղաթելյանը՝ հավելելով, որ գիշեր-ցերեկ աշխատում են, պարբերաբար նաև համայնքային այցելություններ է կատարում խնդիրներին տեղում ծանոթանալու համար:

Նրա փոխանցմամբ՝ գեղաքունիքցիները մարզպետարան ամենաշատը դիմում են աշխատատեղեր չունենալու խնդրով:

Պատասխանելով «Նոյյան Տապան»-ի հարցին, թե ՀԷԿ-երի պատճառով մարզի մի շարք գյուղեր, որոնք նախկինում ոռոգման ջրի խնդիր չեն ունեցել, այսօր կանգնած են նման խնդրի առջև և ակնկալում են պատկան մարմինների միջամտությունը, Ի. Սաղաթելյանն ընդգծեց, որ հարցը վերաբերում է Մարտունու շրջանի մի քանի գյուղերին, որտեղ մասնագետներ են ուղարկվել իրավիճակը գնահատելու համար, նաև անձամբ ինքն է այցելել:

«Կա այդ խնդիրը, բայց մենք կարողացանք համայնքների ղեկավարների և ՀԷԿ-երի սեփականատերերի հետ լուծում գտնել: Այս պահին խնդիրը որոշակիորեն լուծված է, իսկ մյուս տարվա համար ավելի հանգամանալից կտեսնենք, որ ոռոգման սեզոնի սկզբում խնդիրներ չունենանք: Փորձել ենք ջրի արդար բաշխում իրականացնել, իսկ որոշ ՀԷԿ-եր դադարեցրել են իրենց գործունեությունը՝ հաշվի առնելով այս սեզոնին չաշխատելու իրենց պարտավորությունը»,- տեղեկացրեց մարզպետը:

Վերջինս, անդրադառնալով Գեղարքունիքի մարզը մշակութային առումով ավելի ակտիվ դարձնելու խնդրին, նկատեց, որ այդ տեսանկյունից բացթողումները շատ-շատ են, սակայն պատրաստվում են Գավառում շահագործման հանձնել թատրոնի մեծ շենք, որը կարող է լոկոմոտիվ դառնալ մարզում մշակութային կյանքն ավելի աշխուժացնելու համար:

Մանրամասները՝ տեսանյութում

Էլիզա Զախարյան, «Նոյյան Տապան»

Նոյյան տապան - Հասարակություն

Կարդացել են 1207 անգամ

Գավառում պատրաստվում ենք շահագործման հանձնել թատրոնի մեծ շենք. Իշխան Սաղաթելյան (ՏԵՍԱՆՅՈՒԹ)

Noyan Tapan TV