Զորակոչի ոլորտում դեռևս կան չարաշահումներ, սակայն կառավարությունը կանգ չի առնի դրանք արմատախիլ անելու գործում. վարչապետ

26-07-2018 15:07:58 | Հայաստան | Հասարակություն

Զորակոչի ոլորտում դեռևս կան չարաշահումներ, և զարմանալի է, որ մեր նման երկրում այս ոլորտում կարող են այդպիսի չարաշահումներ տեղի ունենալ պաշտոնատար անձանց կողմից:

Այս մասին ՀՀ կառավարության այսօրվա նիստի ընթացքում արձանագրեց վարչապետ Նիկոլ Փաշինյանը՝ երևույթը գնահատելով մեկ բառով՝ խայտառակություն:

Նրա խոսքերով՝ այս ոլորտում կառավարությունը հետևողական և շարունակական աշխատանք է տանելու բոլոր չարաշահումներն արմատախիլ անելու համար:

«Գիտեք զարմանալին ո՞րն է, որ այսքան քաղաքական հայտարարություններ են հնչում, այսքան ասում ենք, հայտարարում, բայց ինչ-որ մարդկանց թվում է, թե կատա՞կ ենք անում, ես չեմ հասկանում»,- նկատեց վարչապետը՝ հավելելով, որ այդքանից հետո դեռ կան կաշառք տվող ու վերցնող մարդիկ:

Ն. Փաշինյանը զգուշացրեց, որ որևէ մեկը չմտածի, թե որևէ կետում որևէ պատճառով իրենք կկանգնեն:

Նա ևս մեկ անգամ պաշտոնապես հայտարարեց, որ կոռուպցիայի հետ կոմպրոմիս չի լինելու:

Կառավարության ղեկավարը բացառիկ կարևոր արձանագրում համարեց այն հանգամանքը, որ երկրում լայնածաված կոռուպցիոն բացահայտումների ֆոնին որևէ քաղաքական հետապնդման մասին հայտարարություն չի հնչել:

Անդրադառնալով բարձրաստիճան պաշտոնյաների զավակների ժամկետային զինծառայության մեկնելու հարցին՝ վարչապետ Փաշինյանն ընդգծեց, որ այդ թեման ուսումնասիրվում է ոստիկանության, ազգային անվտանգության ծառայության և գլխավոր դատախազության կողմից, իսկ գործընթացը չի կարող սահմանափակվել մեկ զորակոչով:

Էլիզա Զախարյան, «Նոյյան Տապան»

Նոյյան տապան - Հասարակություն

Կարդացել են 2422 անգամ

Զորակոչի ոլորտում դեռևս կան չարաշահումներ, սակայն կառավարությունը կանգ չի առնի դրանք արմատախիլ անելու գործում. վարչապետ

Noyan Tapan TV