Համաներման որոշումը համահունչ կլինի հեղափոխության` համերաշխության մթնոլորտ ստեղծելու գաղափարին (ՏԵՍԱՆՅՈՒԹ)

04-09-2018 16:45:25 | Հայաստան | Իրավունք

2013 թվականից Հայաստանում համաներում չի կիրառվել, իսկ ներկա պայմաններում համաներման որոշումը նաև համահունչ կլինի հեղափոխության` համերաշխության մթնոլորտ ստեղծելու գաղափարին:

Այս մասին սեպտեմբերի 4-ին լրագրողների հետ հանդիպման ժամանակ նշեց «Հելսինկյան ասոցիացիա» իրավապաշտպան հասարակական կազմակերպության խորհրդի անդամ, փաստաբան Արայիկ Պապիկյանը:

Ըստ նրա՝ անկախությունից հետո Հայաստանում համաներման 9 որոշում է կայացվել, սակայն վերջին 2-3 տարիներին այդ մասին միայն խոսվել է:

Ա. Պապիկյանի փոխանցմամբ՝ նախորդ տարվա հունիս ամսվա դրությամբ հայաստանյան ՔԿՀ-ներում պահվում է շուրջ 5000 մարդ, որոնցից յուրաքանչյուրի ամսական ծախսերի համար պետությունը 200 հազար դրամ է հատկացնում:

«2018 թվականի բյուջեյով ՔԿՀ-ների համար նախատեսված է ավելի քան 8 մլրդ դրամ գումար, գրեթե նույնքան էլ նախատեսված է դատական իշխանության պահպանման համար, դուք պատկերացնո՞ւմ եք անհեթեթության այս աստիճանը, իսկ նման վիճակ ստեղծվել է մեղմ ասած չափից դուրս շատ դատապարտված կամ կալանավորված անձիք ունենալու պատճառով»,- ընդգծեց փաստաբանը:

Վերջինիս համոզմամբ՝ պետությունը հստակ քաղաքականություն պետք է մշակի ՔԿՀ-ների հետ կապված:

«Նոյյան Տապան»-ի հարցին, արդյոք կոռուպցիոն թաքնված գործընթացներով են պայմանավորված պետության կողմից յուրաքանչյուր դատապարտյալի կարիքները հոգալու համար ամսական տրամադրվող գումարները, Ա. Պապիկյանը փաստեց. «Քրեակատարողական հիմնարկներում գրեթե ոչինչ չի փոխվել, կոռուպցիան եղել է և կա, ոչ ոք չի կարող ժխտել սա»:

Նշենք, որ «Հելսինկյան ասոցիացիա» իրավապաշտպան հասարակական կազմակերպությունն այժմ աշխատում է համաներման որոշման «կմախքային» նախագիծ մշակելու վրա, որը պատրաստվում է առաջարկել կառավարությանը:

Մանրամասները՝ տեսանյութում

Էլիզա Զախարյան, «Նոյյան Տապան»

Նոյյան տապան - Իրավունք

Կարդացել են 1123 անգամ

Համաներման որոշումը համահունչ կլինի հեղափոխության` համերաշխության մթնոլորտ ստեղծելու գաղափարին (ՏԵՍԱՆՅՈՒԹ)

Noyan Tapan TV