«Այս նոր իրավիճակում, եթե մենք ունենք ինչ-որ գաղափարներ, նպատակներ, ապա հնարավորությունները լրիվ կան, որպեսզի դրանք իրականություն դառնան` ի տարբերություն հին Հայաստանի,- սեպտեմբերի 6-ին «Նոյյան Տապան» լրատվական կենտրոնի ուղիղ եթերում հեռարձակվող «Քննարկում» հաղորդաշարի ընթացքում պատասխանելով հարցին, թե ի՞նչ է պատրաստվում անել Երևանի ավագանու անդամ ընտրվելու դեպքում, ասաց «Ժառանգություն» կուսակցության անդամ, Երևանի ավագանու թեկնածու Գևորգ Ղահրամանյանը:- Ինչու ենք ուզում մտնել ավագանի, որովհետև տեսնում ենք քաղաքի խնդիրները, տեսնում ենք ինչ պրոբլեմներ են, ինչ նպատակներ կարելի է դնել և լուծել, և այս ընտրություններում, նորից եմ շեշտում, հենց այս ավագանու ընտրություններն են լավ հնարավորություն, որպեսզի մենք մեր նպատակներն իրագործենք: Շատ տարբեր են այդ խնդիրները, որոնք պետք է դրվեն և լուծվեն` սկսած տրանսպորտի ոլորտից, տրանսպորտային ենթակառուցվածքների ոլորտից, որ մենք ամեն օր ենք դրան բախվում:

Տրանսպորտի վիճակը Երևանում սարսափելի է, եթե եվրոպական մյուս քաղաքների հետ համեմատենք, ուղղակի, չգիտեմ, կատաստրոֆիկ որակում կարելի է տալ Երևանի տրանսպորտին: Օրինակ, նույն տրանսպորտի հետ կապված` կուսակցությունն այսպիսի առաջարկ ունի ծրագրային, տրանսպորտը կարող է լինել մեկ միասնական տոմսով, բոլոր այդ միկրոավտոբուսները, այդ անհարմար երթևեկության պայմանները պետք է վերացվեն, լինեն ավտոբուսներ: Ցավոք, տրամվայների հնարավորությունը դեռևս մոտակա տարիներին անհնար է թվում, պետք է փորձել մետրոն ավելի շատ օգտագործել: Ես կարծում եմ, որ իրատեսական է ընդամենը մեկ կայան ավելացնել առաջիկա տարիներին, ինձ թվում է, Աջափնյակ ուղղությունն ամենահարմարն ու ամենաօպտիմալն է այս պայմաններում: Մյուս կուսակցությունների ծրագրերը նայելով, ես տեսնում եմ, որ մարդիկ գրում են, չէ՞, երեք կայան կավելացնենք, չգիտեմ, ամբողջ քաղաքը մետրոյով կապահովենք, դա, իհարկե, իրատեսական չէ: Պարզ հաշվարկներով շինարարական` դրա ծախսերը չի կարող հոգալ այժմ քաղաքային բյուջեն»:

Այն տրանսպորտը, որից օգտվում է մեր համաքաղաքացին` երևանցին, դա նսեմացուցիչ է պարզապես. ընդգծելով սա, «Ժառանգություն» կուսակցության կողմից առաջադրված Երևանի ավագանու թեկնածու Սեդա Աղբալյանն ասաց.

«Թիվ մեկ խնդիրն է Երևանի, իմ կարծիքով, որովհետև օրվա քանի՞ ժամն ենք մենք տրանսպորտում անցկացնում…Շատ լուրջ թիվ է դա: Թե հասարակական տրանսպորտը, թե անձնական տրանսպորտը նույն խցանումները, նույն պարկինգի պրոբլեմը, կայանման խնդիրը շատ լուրջ խնդիր է մեր համաքաղաքացիների համար դարձել, և դրա լուծումը կարծես թե ոչ մի կերպ չի գտնվում: Մարդիկ ստիպված են լինում հենց նույն կայանման համար կանգնել տարբեր տեղերում, հետո տուգանվել, ժամանակ չեն գտնում` այլ տեղ գտնելու: Ինչ վերաբերվում է հասարակական տրանսպորտին, ես կարծում եմ, որ եվրոպական փորձը ցույց է տալիս, որ նաև ճիշտ կազմակերպման դեպքում բավականին կթեթևանա: Նախ, Երևանի ամբողջ կյանքը կենտրոնացված է Կենտրոն համայնքում: Դա խնդիր է, ես կարծում եմ, որ կարելի է բիզնես միջավայրը տեղափոխել տարբեր համայնքներ, ինչը կօգնի թեթևացնել Կենտրոնի ծանրաբեռնվածությունը: Կարծում եմ, որ տրանսպորտային համակարգը, մետրոն, ինչպես եվրոպական քաղաքներում է, որ մետրոն, ավտոբուսները միասին են, մեկ քարտերով են, միասնական քարտերով են, դա ևս կօգնի որոշակիորեն թեթևացնել խնդիրը: Կարծում եմ, որ ժամերի բաշխվածությունը համալսարաններում, դպրոցներում միգուցե կարողանան այնպես կազմակերպել, որ տարբեր ժամերի հաճախեն և այդպիսով տրանսպորտի խնդիրը էլի կթեթևանա, էլի ավելի համաչափ կբաշխվի: Այսինքն, հասկանում եմ, մետրո կառուցելը, այն էլ Երևանի ռելիեֆն ունեցող քաղաքաի համար լուրջ խնդիր է, որովհետև Երևանն իր ռելիեֆով էլ մետրոյին շատ հարմար քաղաք չէ, բայց, այնուամենայնիվ, կա նաև օդային տրանսպորտի տարբերակ, մենք ճոպանուղի չունենք Երևանում, ունեցել ենք, վնասվել է, չգիտեմ ինչի համար չի վերականգնվում, բայց ես Նոր Նորքում եմ ապրում, ամեն օր առավոտյան վազում եմ, և որ տեսնում են Նոր Նորքից, ասենք, Վարդաշենի կողմը դեպի… Եթե, օրինակ, բիզնես կյանքը մի փոքր էլ այդ թաղամասում կենտրոնացած լիներ և շատ կարճ տրանսպորտ լիներ ճոպանուղու տարբերակով, որ մարդիկ այնտեղ գնային, ինչքան կթեթևանար մեր երթևեկությունն այդ հատվածից: Այնպես որ, ես տրանսպորտի խնդիրը լուծելը շատ իրատեսական եմ համարում»:

Երևանի ժամանակով ժամը 10:00-ից 11։00-ը հաղորդմանը կարելի էր հետևել ԱՄՆ հայկական AABC հեռուստաընկերության ուղիղ եթերում, ինչպես նաև առցանց՝ «Նոյյան Տապան»-ի  www.nt.am կայքով, «Նոյյան Տապան» հեռուստաընկերության Youtube-յան  ալիքով, «Նոյյան Տապան» ֆեյսբուքյան էջում և «Noyan Tapan»‰  ֆեյսբուքյան խմբում։