Lragir.am-ի  զրուցակիցն է Արցախի Հանրապետության նախագահի մամուլի խոսնակ Դավիթ Բաբայանը

 

Պարոն Բաբայան, Սամվել Բաբայանը հայտարարել է, որ 2017-ին Սերժ Սարգսյանը Արցախում հավաքել է իշխանությանն ու ակտիվին և խոսել, որ պետք է լինեն զիջումներ, ու իշխանությունը ձայն չի հանել: Արցախի նախկին վարչապետ Արայիկ Հարությունյանը անդրադարձել է Բաբայանի այս հայտարարությանը՝ նշելով, որ երկու հանդիպում է եղել 2016-ին և եկել են ընդհանուր օրակարգի, որ չի կարող լինել Արցախի ներկայիս կարգավիճակից որևէ քայլ զիջում և պետք է Արցախի անվտանգությունը երաշխավորված լինի բացարձակ կերպով: Կմանրամասնե՞ք՝ ինչ էր առաջարկվում ձեզ։

 

Սամվել Բաբայանը մատնանշել է, որ պարզաբանումների համար դիմեն Արցախի ազատագրական շարժման ակտիվիստներ Արմո Ծատուրյանին և Ռազմիկ Պետրոսյանին։ Եվ իրենք, ինչպես նաև այլ քաղաքական ուժերի ներկայացուցիներ, ինչպիսիք եք Արայիկ Հարությունյանը, Վիտալի Բալասանյանը, Աշոտ Ղուլյանը, անդրադարձել են այդ հայտարարությանը, ներկայացրել են իրենց տեսակետները և պարզաբանել իրավիճակը։ Այսպիսի բացահայտումները վկայում են, որ նախևառաջ կա հասարակական մեծ հետաքրքրություն այդ հարցի վերաբերյալ, ինչը շատ լավ է, որովհետև արցախյան հիմնախնդիրը հայոց պետականության կարևորագույն հարցն է, և այստեղ, իմ կարծիքով, միշտ պետք է լինի հետաքրքրություն, պետք է այս հարցը միշտ լինի ուշադրության կենտրոնում։ 12 տարի մենք խոսում ենք, որ որևէ զիջում չի կարող լինել, մենք բազմիցս հայտարարել ենք, որ չի կարող լինել հետդարձ թե կարգավիճակի, թե սահմանների հարցում։

 

2016-ի այդ երկու հանդիպումներին Դուք ներկա եղե՞լ եք։

 

Այո, որոշ քննարկումների ներկա եմ եղել։ Եվ ես ուզում եմ նորից վերահաստատել՝ Արցախի դիրքորոշումը որևէ փոփոխության չի ենթարկվել։ Մենք միշտ նշել ենք, որ մեզ համար առաջին հերթին կարևորագույն խնդիրներից է Արցախի կարգավիճակը, և մենք միշտ նշում ենք, որ Արցախը երբևէ չի լինելու Ադրբեջանի մաս։ Սա շատ հստակ միշտ բարձրաձայնվել է, որևէ անգամ այս մտքից չենք հրաժարվել, և մենք միշտ շարունակելու ենք այս ոճով առաջնորդվել, որովհետև ի վերջո սա ոչ միայն մեր երկրի ապագան է, այլ յուրաքանչյուր մարդու, յուրաքանչյուրի ապագան է, և մենք պարտավոր ենք այդ մասին միշտ խոսել։ Եվ ոչ միայն այդ հանդիպումների ժամանակ, այլ ընդհանրապես երբևէ եղե՞լ է մեր կողմից այս դիրքորոշման փոփոխություն։

 

Ի վերջո, ի՞նչ էր առաջարկվում, ի՞նչ էիք քննարկում այդ երկու հանդիպումների ժամանակ։

 

Տեսեք՝ այդ ամենի մասին արդեն խոսել են և կարիք չկա նորից կրկնել, բոլորը խոսել են, և պարոն Բաբայանի մատնանշած անձնավորությունները, և այլ ուժերի ներկայացուցիչներ։ Եվ եղել է ընդհանուր մոտեցում։ Խոսվել է հետևյալի մասին՝ Ադրբեջանը սա է ուզում, այսպիսի տեսլական ունի, իսկ մեր տեսլականը սա է։ Եվ նման հարցեր են քննարկվել, բայց որևէ պարտադրանք, որևէ կոնկրետ սցենարի քննարկում չի եղել, հատկապես այսպիսի ձևաչափով չի կարող լինել, որովհետև սա ի վերջո հանրային պիտի դառնար։ Միգուցե ինչ-որ հարցերի էություն պահանջում է, որ լինեն փակ քննարկումներ, բայց ի վերջո,  որևէ խնդիր հնարավոր չէ թաքցնել հասարակությունից։

 

Այսինքն՝ եկել եք ընդհանուր հայտարարի՞ 2016-ին, կոնսենսո՞ւս է եղել։

 

Որևէ կոնսենսուս, որևէ նման հարց չի եղել, որ լիներ կոնսենսուս, պարզապես ընդհանուր ներկայացվել է բանակցային գործընթացի ընթացքը։ Այդքան բան։

 

Սերժ Սարգսյանը խոսե՞լ է միջազգային ճնշումներից, եղե՞լ են այդպիսիք։

 

Որևէ ճնշում չի եղել։ Գիտեք, որ ԵԱՀԿ Մինսկի խմբի համանախագահները և իրենց երկրների ղեկավարների շուրթերով, և տարբեր պաշտոնյաների, միշտ ասել են, որ իրենք որևէ առաջարկ, որը պարտադիր ձևով պետք է ընդունվի, չեն անում։ Այսինքն՝ կողմերն իրենք պետք է գան ընդհանուր հայտարարի։

 

Այնուամենայնիվ, զիջումների առաջարկ չի՞ եղել։

 

Ոչ, չի եղել, ներկայացվել է ընդհանուր պատկերը։