Քաղաքապետարանում հույս ունեն մետրոյի երկու նոր կայարանների կառուցումը սկսել 2020 թվականի սկզբից (ՏԵՍԱՆՅՈՒԹ)

15-05-2019 14:45:42 | Հայաստան | Հասարակություն

Երևանի քաղաքապետարանում հույս ունեն մինչև հունվար ավարտել մետրոպոլիտենի երկու կայարանների նախագծման աշխատանքները, իսկ 2020 թվականի տարեսկզբից սկսել շինարարական աշխատանքները:

Այս մասին մայիսի 15-ին լրագրողների հետ հանդիպման ժամանակ նշեց Երևանի գլխավոր ճարտարապետ Արթուր Մեսչյանը:

Ըստ նրա՝ սա այն դեպքն է, երբ մետրոպոլիտենի կայարան կառուցելն իրականացվում է ոչ թե բյուջետային միջոցներով, այլ՝ կառուցապատողների:

«Ընդհանրապես մետրոպոլիտենն իր կառուցվածքով շատ բարդ համակարգ է, տարբեր ոլորտի մասնագետներ պետք է ներգրավել, և մենք աշխատում ենք այդ մասնագետների հետ, որպեսզի վերջնականապես ճշտենք մետրոպոլիտենի քաղաքականությունը և բոլոր նրբությունները, որոնք կապված են այդ ծրագրի հետ»,- նկատեց Ա. Մեսչյանը:

Վերջինս անդրադառնալով ճոպանուղու ծրագրին՝ նշեց, որ այն իրականացնելով՝ կլուծեն բավականին խնդիրներ կապված մայրաքաղաքի կենտրոնը բեռնաթափելու հետ:

Գլխավոր ճարտարապետի խոսքերով՝ իրենց սկզբնական խնդիրը Նոր Նորքը Երևանի կենտրոնին կապելն է, այնուհետև ծրագիրը կարող է ընդլայնվել՝ ներառելով նաև Հաղթանակի այգին:

«Դա ևս կառուցվում է ոչ բյուջետային ներդրումով. մենք աշխատում ենք կառուցապատողների հետ, որոնք կֆինանսավորեն ճոպանուղու ծրագիրը»,- նշեց Ա. Մեսչյանը՝ անկեղծանալով, որ այս պահին ավելի շատ զբաղված են դիվանագիտությամբ, քան ճարտարապետությամբ՝ նկատի ունենալով տարբեր կառուցապատողների հետ բանակցությունները:

Նրա փոխանցմամբ՝ այս պահին կան կառուցապատողներ, որոնք պատրաստ են իրականացնել ճոպանուղու ծրագիրը, սակայն նրանց անուններն առայժմ չեն հրապարակայանացնում, իսկ կառուցվելիք ճոպանուղին բացառապես տրանսպորտային միջոց կծառայի:

Մանրամասները՝ տեսանյութում

Էլիզա Զախարյան, «Նոյյան Տապան»

Նոյյան տապան - Հասարակություն

Կարդացել են 1797 անգամ

Քաղաքապետարանում հույս ունեն մետրոյի երկու նոր կայարանների կառուցումը սկսել 2020 թվականի սկզբից (ՏԵՍԱՆՅՈՒԹ)

Noyan Tapan TV