«Օրվա թեման». Խաղ կրակի հետ. Ո՞վ է կրելու պատասխանատվությունը (ՏԵՍԱՆՅՈՒԹ)
20-05-2019 15:18:50 | Հայաստան | Օրվա թեման
Դատարանը չորս օր դռնբաց կարգով քննում էր ՀՀ երկրորդ նախագահ Ռոբերտ Քոչարյանի խափանման միջոցի հիմնավոր լինել-չլինելու հարցը: Քոչարյանին կալանքից ազատելու երաշխավորագրով դատարան էին ներկայացել Արցախի նախկին և գործող նախագահներ՝ Արկադի Ղուկասյանն ու Բակո Սահակյանը։
Բոլոր այդ օրերին զգացվում էր մեծ լարվածություն․ մամուլում հրապարակվեցին նյութեր, որոնք վկայում էին, որ Հայաստանի և Արցախի քաղաքական վերնախավի միջև առկա են լուրջ տարաձայնություններ, ոմանք դա անվանեցին ճգնաժամ, ոմանք էլ համարեցին, որ փորձ է արվում Արցախը դարձնել հակահեղափոխության պլացդարմ:
Ստեղծված իրավիճակի կապակցությամբ վարչապետ Նիկոլ Փաշինյանն իր ֆեյսբուքյան էջում գրեց.
«Մամուլում շատ է գրվում, թե ոմանք փորձում են Արցախը դարձնել հակահեղափոխության օջախ: Արցախյան վերջին այցից կիսեմ տպավորություններս. եթե ոմանք փորձեն Արցախը դարձնել հակահեղափոխության օջախ, Արցախի ժողովուրդը այն կդարձնի հեղափոխության օջախ»:
Խնդրին անդրադարձ եղավ նաև Արցախից: Լեռնային Ղարաբաղի նախագահի խոսնակ Դավիթ Բաբայանը նույնպես ֆեյսբուքյան գրառում կատարեց։ Նա, մասնավորապես, նշեց.
«Արցախ/ը ո՛չ հեղափոխական և ո՛չ էլ հակահեղափոխական կենտրոն է Հայաստանի Հանրապետության համար։ Մենք մեկ հայրենիք ենք, բայց երկու պետական կառույց ենք։ Արցախի ո՛չ ժողովուրդը և ո՛չ էլ իշխանությունը նպատակ չունեն միջամտելու Հայաստանի Հանրապետության ներքաղաքական զարգացումներին։Նույն տեսլականը, համոզված եմ, ունեն Հայաստանի Հանրապետությունը և պաշտոնական Երևանը։ Մենք շատ լավ գիտենք՝ ինչ է նշանակում ամուր հասարակություն, գիտենք, որ եթե խարխլվի մեր միասնականությունը, խարխլվի իրավիճակը Հայաստանի Հանրապետությունում, սա միմիայն օգուտ է լինելու մեր հակառակորդին, սա կարող է բերել վատ հետևանքների»։
Համատեղ հայտարարությամբ հանդես եկան նաև Արցախյան մի շարք քաղաքական ուժեր՝ նշելով.
«Վերջին օրերին Արցախի և Մայր Հայաստանի իշխանությունների միջև նույնիսկ անզեն աչքով նկատելի խզումը մտահոգիչ է և հղի անկանխատեսելի հետևանքներով:
Չկան Հայաստանի ու Արցախի ժողովուրդներ, կա հայ ժողովուրդ, որը ինչպես միասնական էր Արցախը թշնամու ճիրաններից փրկելու օրհասական պայքարում՝ իբրև փրկագին զոհաբերելով ազգի սերուցքը, այնպես էլ միասնական պայքարելու է մինչև վերջնական հաղթանակի ազդարարումը: Չկա Արցախ առանց Հայաստանի, և չկա Հայաստան առանց Արցախի, կամ ինչպես քաջազուն Լեոնիդ Ազգալդյանը կասեր՝ սա Հայաստան է և վերջ:
Մենք դատապարտում ենք յուրաքանչյուր անխոհեմ քայլ, ինչը վնաս է հասցնում մեր միասնականությանը, դատապարտում ենք Մայր Հայրենիքում մեծամասնության վստահությանը արժանացած վարչապետի հանդեպ հեգնանքի ու արհամարհանքի յուրաքանչյուր դրսևորում, դատապարտում ենք հայերին ղարաբաղցիների ու հայաստանցիների տարանջատելու ցանկացած փորձ:
Եվ այսպես, ինչ է կատարվում Հայաստան-Արցախ հարաբերություններում եւ ինչին այս ամենը կարող է հանգեցնել»։
Հիշեցնենք, որ Հայաստան-Արցախ հարաբերություններում հնարավոր լարվածության մասին սկսեցին խոսել մայիսի 9-ից, երբ Արցախի անվտանգության խորհրդի քարտուղար Վիտալի Բալասանյանն ի պատասխան սահմանին հակառակորդի ակտիվացման մասին լրագրողի հարցին, ասել էր, որ այն պետք է ուղղել Հայաստանի վարչապետ Նիկոլ Փաշինյանին, քանի որ վերջինս է Ադրբեջանի նախագահի հետ գտնվում «վերելակային բանակցությունների» մեջ:
Մանրամասները՝ տեսանյութում
Էլիզա Զախարյան, «Նոյյան Տապան»
Հաղորդումները ուղիղ հեռարձակմամբ կարելի է դիտել Նոյյան Տապան Ալիքով, որը հեռարձակվում է հետևյալ մալուխային ցանցերով․
Հաղորդման ուղիղ հեռարձակման ընթացքում կարելի է զանգահարել եւ հարցեր ուղղել բանախոսներին ամերիկյան 818 967 53 21 եւ հայաստանյան +374 60 35 11 31 հեռ/համարներով, Wiber, WhatsApp +374 55 50 90 75 համարով:
«Նոյյան Տապան»-ին աջակցել ցանկացողները կարող են մուտք գործել համապատասխան բաժինը հետեւյալ հղումներով
Սիրելի հայրենակիցներ, մենք շատ ուրախ ենք տեսնել ձեր գրառումները եւ քննարկումները, սակայն հայհոյանքները ջնջվելու են, իսկ գռեհիկ գրառումների հեղինակները արգելափակվելուեն։
ՀԱՅԵՐԵՆ
Русский
English
Դաս. հայերեն
French
