Իրանահայ «Զարթոնքը» կմասնակցի «Պարեր Էլբրուսի ստորոտին»
միջազգային փառատոնին
29-09-2009 17:20:00 | Ռուսաստան | Մշակույթ
ՆԱԼՉԻԿ, 29 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ: «Պարեր
Էլբրուսի ստորոտին» միջազգային փառատոնին մասնակցելու նպատակով
Նալչիկ են ժամանել ստեղծագործական կոլեկտիվներ Ռուսաստանից,
Իսպանիայից, Թուրքիայից, Իրանից եւ նույնիսկ հեռավոր Աֆրիկյան
մայրացամաքից: Իրանից փառատոնին մասնակցում է «Զարթոնք» հայկական
խումբը:
Ինչպես գրում է Analitika.at.ua-ն վկայակոչելով «Միր»
հեռուստաընկերությունը, այդ թափով «Էլբրուսի ստորոտին» պարել են 15
տարի առաջ: Հենց այդ ժամանակ էլ, եւ դարձյալ Նալչիկում, կայացավ
առաջին ազգագրական փառատոնը: Որոշեցին վերհիշել եւ կրկնել
միջազգային մակարդակի մեծ տոնը: Հարյուրավոր արտիստներ,
գործնականորեն ողջ աշխարհից, ցուցադրում են պարարվեստի իրենց
վարպետությունը:
Հայկական «Զարթոնքը» կատարում է հայկական ժողովրդական պարեր,
որոնք հատիկ առ հատիկ վերականգնվել են Թեհրանում:
«Ես ինձ զգում եմ ինչպես տանը, Հայաստանում: Այստեղ եւ
բնությունը, եւ մարդիկ, եւ մշակույթը` ամեն բան շատ նման է»,- նշեց
Լեւոն Ավետիսյանը:
Հատուկ հյուրերի համար ստեղծել են հնաոճ վարպետների քաղաք:
Այստեղ փառատոնի մասնակիցները կարող են ծանոթանալ ոչ միայն
կաբարդինների եւ բալկարների դեկորատիվ-կիրառական արվեստին, այլեւ
ազգային տարազին եւ խաղերին, ինչպես նաեւ ճաշակել կովկասյան
խոհանոցի կերակրատեսակներ: