ՀԱԱԳԱ, 24 ՀՈՒՆԻՍԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ: Նիդեռլանդներում գործող հայկական «Աբովյան» մշակութային ընկերության ստեղծման 25-ամյա հոբելյանի առթիվ շնորհավորական ուղերձ է հղել ՀՀ սփյուռքի նախարար Հրանուշ Հակոբյանը` բարձր գնահատելով ընկերության գործունեությունը: «Աբովյան» ընկերությունը հիմնադրվել է 1984թ. հունիսի 19-ին Նիդեռլանդների Հաագա քաղաքում: Ինչպես տեղեկանում ենք Հաագայից ստացված հաղորդագրությունից, տարեդարձի առթիվ ընկերությունը կազմակերպում է հայկական կինոփառատոն` համագործակցելով Հաագայի Filmhuis Den Haag-ի եւ երեւանյան «Ոսկե Ծիրան» կինոփառատոնների հետ: Հոկտեմբերի 22-ին մեկնարկելիք փառատոնը կներկայացնի հայկական կինոյի անցած ուղին: Նախատեսվում է նաեւ հրատարակել որոշ գրքեր: Անցած 25 տարիների ընթացքում «Աբովյան» հայկական մշակութային ընկերությունը հետաքրքիր է դարձրել Նիդեռլանդների հայ համայնքի մշակութային կյանքը` կազմակերպելով շաբաթական հանդիպումներ եւ հայոց լեզվի, պատմության ու մշակույթի դասընթացներ, միջոցառումներ, հրատարակելով պարբերականներ: «Աբովյան» մշակութային ընկերությունը միշտ սերտ հարաբերությունների մեջ է եղել Հայաստանի եւ Սփյուռքի հասարակական ու մշակութային կազմակերպությունների հետ: Բազմիցս դերասանական խմբեր եւ անհատներ են հրավիրվել մշակութային ծրագրերին մասնակցելու համար: Մշակութային կենտրոն են այցելել նաեւ ուսանողներ, մարզիկներ, գիտնականներ:

---